Bimenes celebra esti sábadu la Romería de la Oficialidá

Esti sábadu va celebrase en Bimenes la Romería de la Oficialidá, eventu que ye una continuidá de la Fiesta de la Oficialidá de la Llingua Asturiana. La escritora Ana Vanessa Gutiérrez va ser la encargada de lleer el pregón.
 
La Romería de la Oficialidá naz de la fusión de la Fiesta de la Oficialidá cola Romería Asturiana que veníen celebrando en mayu les asociaciones culturales Los Yerbatos y El Corriellu la Pandorga col oxetivu de dar más puxu a esta celebración que conmemora la declaración d’oficialidá nel conceyu yerbatu –torgada llueu pol Tribunal Constitucional– nel Plenu del 5 de xunetu del 1997. Esti añu, la celebración adelántase a mañana pa nun coincidir col Festival de la Sidra de Nava, anque pa ediciones próximes va recuperar la fecha orixinal: el primer sábadu de xunetu.
 
L’actividá en Martimporra va principiar a les 11 hores con un pasucais que va dar pasu, a les 11.30 hores, a la llectura del pregón na Casa Conceyu. Al meudía va celebrase la misa y la procesión, pa depués entamar la puya’l ramu y la Danza de la Oficialidá. Tamién va haber actuaciones de bandes de gaites y de grupos de bailles infantiles. Pa les 14.30 hores ta prevista, nel polideportivu del colexu públicu, la xinta popular, que va consistir nun pinchéu con tortielles, bollos preñaos, costielles y empanaes, ente otres viandes, postre y bébora. El so preciu ye de 15 euros y ye necesario confirmar asistencia nel teléfonu 985.70.01.64 o na propia Casa Conceyu.
 
Yá de tarde, coles fuercies recargaes, yerbatos y visitantes van poder disfrutar del XIII Concursu de Gaiteros y Gaiteres Mozos (16.30 hores) y del Festival Folklóricu (18.30 hores), nel que van participar les bandes de gaites Ciudad de Cangas de Onís, Villa y Condáu de Noreña y Los Yerbatos, amás de los grupos de baille La Flor del Pumar (Nava), La Deva (Xixón), Los Yerbatos (Bimenes) y Asubío (Vigo), y del coriquín tradicional El Corriellu la Pandorga. A les 21 hores ta prevista la llectura d’un Manifiestu pola Oficialidá por parte de neños y neñes y mayores del conceyu, pa zarrar la xornada festiva cola actuación, media hora más tarde, d’Anabel Santiago, David Varela y Javi Álvarez ‘Pitu’, que van tar acompañaos de los escolinos y escolines del cursu de canción asturiana de Bimenes.