“Bienveníos sían los apoyos que dende otres alministraciones vengan a reafirmar lo qu’esti Gobiernu lleva nel so compromisu eleutoral”, apunta Piñán

|
Melania Álvarez García y Berta Piñán rueda de prensa PNL oficialidá

La conseyera de Cultura, Política Llingüística y Turismu, Berta Piñán, caltuvo los plazos marcaos pol presidente Adrián Barbón pa entamar la negociación pa una reforma estatutaria qu’incluya la oficialidá tres l’encamientu del Congresu al Executivu estatal al respeuto. “Bienveníos sían los apoyos que dende otres alministraciones vengan a reafirmar lo qu’esti Gobiernu lleva nel so compromisu eleutoral”, señaló.

“Abordaráse a partir del final d’esti añu l’alderique precisu pa llegar a un consensu lo más ampliu posible, porque entendemos que l’alderique del asturianu y de la oficialidá implica un gran consensu social que tien que trabayase. Va tener les sos dificultaes, pero seguramente llegaremos a bon puertu”, esplicó la escritora.

No que respeuta a l’aprobación ayeri nel Congresu del puntu 4 de la Proposición Non de Llei sobre la Realidá Plurillingüe y Igualdá Llingüística, col apoyu del grupu socialista, qu’encamienta al Executivu estatal a “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidad del territoriu onde se falen”, en referencia nidia al casu asturianu y al aragonés, Piñán apuntó que “bienveníos sían los apoyos que dende otres instancies y dende otres alministraciones vengan a reafirmar lo qu’esti Gobiernu yá lleva nel so compromisu eleutoral”. Esta propuesta presentada por Xuníes Podemos y les sos confluencies, ERC-Sobiranistes, Junts y PDeCAT, EAJ-PNV, Más País, CUP, BNG y Compromís, amás d'EH Bildu que s'encargó de defendela nel Congresu, contó tamién col sofitu de Teruel Existe.

Reconstrucción de Valgrande-Payares

Piñán fixo estes declaraciones tres el Conseyu de Gobiernu celebráu esta mañana, nel que s’aprobó la firma d’un conveniu marcu col Institutu pa la Transición Xusta, dependiente del Ministeriu pa la Transición Ecolóxica y Retu Demográficu, que va permitir impulsar cinco proyeutos con financiación a cargu de los fondos mineros del periodu 2013-2018. Ente ellos rescampla la reconstrucción de la estación de Valgrande-Payares “como motor económicu pal valle de Ḷḷena que xeneró emplegu y un fluxu d’empreses qu’ufierten dellos servicios”, a la que se va dedicar 10 millones d’euros, na que afondó la conseyera.

Les obres restantes son la segunda fase del desarrollu d’un espaciu empresarial y comercial nuevu nos vieyos Talleres del Conde, en Llangréu (3,2 millones d’euros), l’ameyoramientu enerxéticu de la rede d’allumáu públicu de Mieres (1,3 millones), la meyora de la eficiencia enerxética y mengua d’emisiones nel tresporte públicu de Mieres (847.000); y el fomentu de la compra pública innovadora n’Ibias y Degaña (897.000 euros).

Na semeya, la vocera del Executivu y conseyera de Derechos Sociales y Bienestar, Melania Álvarez García, y Piñán.

Contador Estadistiques