La Fundación Belenos asoleya’l númberu 34 de ‘Asturies, memoria encesa d’un país’

|

La revista de la Fundación Belenos, ‘Asturies, memoria encesa d’un país’, algama’l númberu 34. Nacida en payares del 1996, esta espublización recueye artículos d’interés de temática variada venceyaos a la cultura asturiana.

Asina, los llectores van atopar los testos siguientes: ‘Averamientu a la ecoloxía de los conceyos asturianos del Altu Navia’, de Fernando Montes García; ‘Una reflexón sol celtismu llingüísticu asturianu’, de Xosé Lluís García Arias; ‘Afayu d’una estela con decoración castreña n’Antrialgu (Piloña)’, d’Ástur Paredes, Daniel Cueli Canto y Alberto Álvarez Peña; ‘El guerreru durmiente’, d’Alberto Álvarez Peña; ‘El palu: un arma na tradición asturiana’, de Gausón Fernande Gutierri; ‘Catalogar pa protexer: el padremuñu etnográficu del conceyu de Cabrales’, de Diego Ruiz de la Peña Ruiz y Alberto Álvarez Uría; ‘El “Celta o Astur”, una escultura de Folgueras’, de Lluis Portal Hevia; y  ‘Cill Áirne: trenta años d’un viaxe iniciáticu a la verde Erín’,  d’Ignaciu Llope. Esti númberu tamién inclúi les estayes habituales ‘Memoria gráfica d’Asturies’, firmada nesta ocasión por Antón Álvarez Sevilla, que va ufrir imaxes y datos sobre les races autóctones asturianes inéditos nos sos trabayos anteriores, y ‘Cartafueyos de Belenos’.

La revista 34 de ‘Asturies, memoria encesa d’un país’, correspondiente al añu 2014 tres la decisión del Conseyu de Redaición de convertir n’añal la espublización, va aportar nos díes próximos a los domicilios de los suscriptores. D’igual forma, yá ta a la venta nes llibreríes Ojanguren (Uviéu), Paradiso (Xixón) y Rima (L’Infiestu) al preciu de 15 euros.

Contador Estadistiques