Baxa la bolsa y los tipos nos EEXX

Feble selmana pa los mercaos bursátiles internacionales con cayíes xeneralizaes tanto nel Vieyu Continente como al otru lláu del Atlánticu. Cayida técnica del Ibex-35 que por primer vegada en munches selmanes tien un resultáu selmanal negativu. L´Ibex asistiose'l vienres nos 6.970,10, perbaxu de la cota psicolóxica de los 7.000, mientres que'l miércoles la Reserva Federal d´Estaos Xuníos fizo una baxada de tipos perimportante qu'abre la posibilidá de nueves baxaes n'Europa. Si nel Vieyu Continente los resultaos nun pintaron bien, otru tantu pasó en Wall Street.




Perimportante cayida de Zeltia al nun enfotase los inversores nel gran valor de la compañía biotecnolóxica que ye´l fármacu anticanceríxenu Yondelis. La compañía marcó la mayor baxada del vienres con un -23%. Sogecable tuvo una xuba del 6% gracies a un informe de Morgan Stanley que-y da a la empresa de Polanco una potencial xuba del 70%. NH Hoteles tamién tuvo un bon pieslle con una xuba del 5,01% pola decisión de la CNMV de da-y via llibre a la OPA d'Hesperia sobre la cadena hotelera.

Nel llau de les perdes, Dragados y Repsol baxaron sobre'l 1% caún. Arcelor, con una cayida del 6,01% y Abertis con unes perdes del 5,27% foron dalgunos de los valores más perxudicaos de la baxada bursátil. El Grupu Telefónica cotizó a la baxa a lo llargo de tola selmana, pero cotizaciones aparte, la noticia de la selmana foi la confirmación de la venta del Banco Atlántico. A los propietarios, un grupu d´empresarios árabes, ya nun-yos presta caltener el bancu con sede en Barcelona. Con esta anuncia apaecieron delles iniciatives pa cortexar ún de los bancos medianos más importantes: Popular, Sabadell, Barclays y, como non, un puñau de caxes d´aforros, aporfiaron pol Atllántico, que medró la selmana pasada penriba´l 39%.

Otramiente, el volume de negociu del vienres algamó los 1.700 millones d´euros, un bon datu teniendo en cuenta que nel periodu de veranu les perres tamién garren vacaciones. El selectivu Ibex-35 tuvo una cayida selmanal del 1,37% anque´l vienres trancó con una probetaya xuba del 0,37% hasta los 6.970,10 puntos. L´Índiz xeneral de la Bolsa de Madrid mangóse nos 728,03 gracies a una cayida del 1,25%, mentantu'l tecnolóxicu índiz Nuevu Mercáu asistiose nos 1.751,20 puntos con una cayida del 6,46%.

La meyora de les perspectives macroeconómiques d´Estaos Xuníos. La estadística de confianza del consumidor norteamericanu de la Universidá de Michigan con 89,7 puntos superó les espectatives de dellos analistes. Esti bon datu emburrió a dellos inversores a tomar posiciones lo que paró una cayida mayor nes bolses. Ente les estadístiques de la selmana ta tamién el datu de renta / gastu personal norteamericanu, que foi positivu. Otru datu señeru foi la balanza por cuenta corriente na Zona Euru, onde aparez un negativu de 8.100 millones d´euros en comparanza con un positivu de 1.400 millones d´euros anterior. Les estadístiques de PIB de Francia y Reinu Xuníu foron les esperaes nel casu francés pero negatives nel inglés con un crecimientu del 0,3% y 0,1% respectivamente.

Xuba del preciu del barril brent pa mangase nos 27,2 dólares na selmana en que l´euru peslló en 1,1415 dólares dempués de dar dellos blincos por culpa de los resultaos macroeconómicos de dalgunos países europeos. Perimportantes cayíes de los bonos nun escenariu en que la renta fixo pierde interés pa los inversores. Estes cayíes emburrioles la rebaxa de 0.25 puntos de la Reserva Federal. El pieslle de les carteres de los brokers del primer semestre cuadró un poco meyor los resultaos, y el resume de les bolses nesti primer semestre del añu ye bonu en cuantes que tan afitándose xubes nun escenariu económicu estráu de duldes. Ye un bon entamu pa qu´esti seya´l primer añu de ganancies nes bolses dempués de 3 años seguíos nel tarrén de les perdes.