Barbón sigue dando prioridá a la vacunación y caltién la reforma del Estatutu pa los “últimos meses d’esti añu”

|
Adrián Barbón Plenu Xunta Xeneral

“Ésa ye la previsión cola que nosotros trabayamos teniendo en cuenta’l ritmu de vacunación y eso ye lo que vamos facer como Gobiernu d’Asturies”, espresó n’asturianu’l presidente Adrián Barbón esti miércoles na Xunta Xeneral. Daniel Ripa, voceru de Podemos, entrugara-y sobre los plazos de la oficialidá y asegurara que “27 ye un númberu que va pasar a la historia d’Asturies”.

El secretariu xeneral de la formación morada, que como los sos compañeros de grupu llevaben una camiseta col logu nuevu de ‘Oficialidá’ de la Xunta pola Defensa de la Llingua Asturiana, fixo la pregunta “¿comparte usté con nosotres que ye'l momentu de que les fuercies polítiques qu'apostamos pola oficialidá, y que yá tenemos la mayoría parlamentaria necesaria, llevemos alantre la reforma estatutaria pa garantizar los derechos de los y les falantes d'asturianu y gallego-asturiano, en consonancia cola mayoría social que defende la oficialidá?" a Barbón, que nun primer momentu respondió que “yo lo que comparto ye qu’esti añu, el 15 d’avientu, van cumplise 40 años de l’aprobación del Estatutu d’Autonomía y precisamente por eso, nosotros, dende’l Gobiernu d’Asturies, defendemos la necesidá de reformar l’Estatutu d’Autonomía”, una reforma que quier llevar más allá del aspeutu llingüísticu.

Nesi sen recordó que p’aprobalu “necesítense 27 diputaos, una cosa non menor”. Un númberu que Ripa considera que yá se sumen, optimista cola posibilidá de que Foro sofite la reforma estatutaria: “27 ye un númberu que va pasar a la historia d’Asturies”, aseguró.

Sicasí, apuntó que “tamién podemos ser más”, en defensa d’algamar el mayor consensu posible. “Cuanto más sofitu sume la oficialidá nesti Parllamentu más vamos acercanos a la sociedá asturiana, qu’asume con normalidá la pluralidá de la so xente y la riqueza de los sos idiomes. Aprobemos la oficialidá pa paecenos más Asturies”, reclamó.

“Hai que sumar más, pero nun hai perder de vista que yá somos abondo”, siguió Ripa, que defendió una reforma tresversal, amás de pa la cuestión llingüística, p’ampliar los derechos de la ciudadanía, avances n’autogobiernu y cohesión territorial. “Va reforcianos como comunidá, y va ayudanos na fase de reactivación social y económica tres l’andanciu”, apuntó.

“Tenemos en resume el qué y el cómo, fáltanos el cuándo”, señaló-y a Barbón, alvirtiendo que “los plazos son mui axustaos. Queden yá menos de 22 meses de periodos de sesiones nesti Parllamentu. La discusión y tramitación de la Llei de reforma del Estatutu va suponer ente 6 y 12 meses nesta Cámara y nel Congresu los tiempos s’allarguen y tenemos que calcular un mínimu d’un añu pa completar tol procedimientu” y “a la llexislatura en Madrid namái-y queden dos años y mediu”. “Necesitamos entamar yá”, encamentó.

Fuxir de la provocación

El presidente respondió na réplica que la reforma del Estatutu “nun tien que ser una reforma amplia; tien que ser p’aspeutos mui concretos, mui trabayaos, al rodiu puntos sensibles”. Darréu recordó les sos pallabres de que “habría d’afrontase una vez que tuviéramos controlada la situación de pandemia, que se basa nun datu non menor, que ye la inmunización del pueblu asturianu”.

“Lo que toi poniendo de manifiestu ye que la reforma del Estatutu d’Autonomía tendrá qu’afrontase nos últimos meses d’esti añu. Ésta ye la previsión cola que nosotros trabayamos teniendo en cuenta’l ritmu de vacunación y eso ye lo que vamos facer como Gobiernu d’Asturies”, siguió, insistiendo na idea de nun centrase namái na cuestión llingüística y tratar tamién “dalgunos aspeutos fundamentales”, como la incorporación d’elementos xurídicos a los que l’Executivu nun tien anguaño accesu y sí otres autonomíes, “como ye l’aprobación de decretos-llei, que permite dar otru tipu de respuestes a la pandemia”.

Sobre’l consensu calcó en que “tien que ser tresversal, y tien que selo nel mesmu momentu nel que tenemos que ser 27 diputaos. Pero ye qu’amás el consensu nun ye sólo l’aprobación de la reforma del Estatutu pa la oficialidá, ye llueu l’aprobación de la Llei que desarrolle esa oficialidá, na qu’habrá que definir el modelu”, que tendrá que ser “d’acorde a la nuesa realidá sociollingüística”, y ehí “tenemos que ser los más amplios posibles pa incorporar cuanto más xente meyor”.

Nesti puntu fixo un llamáu a la derecha de la Cámara, “non a VOX, que nun cree nel estáu autonómicu”, dirixéndose direutamente al PP, al que convidó “a abandonar los postulaos negacionistes sobre la reforma del Estatutu, y sobre manera dende’l puntu cultural y llingüísticu. Qu’imite un poco más al PP de Galicia nel arguyu al so patrimoniu cultural y qu’en llugar de despreciu y complexu esprese arguyu y apreciu”. Por último, emplegó’l gallego-asturiano – apuntando que “nesti casu yo prefiero falar siempre de fala eonaviega”– y encamentó a “fuxir de la provocación” y, como respuesta única, “siguir trabayando”.

“Visión amplia, busca de consensu, definición d’un modelu propiu d’oficialidá, evitar les provocaciones y consiguir que la reforma del Estatutu d’Autonomía tenga ésitu. Y yo a eso ye a lo que me voi a implicar como presidente, porque yá toca, 40 años depués de l’aprobación del Estatutu”, resumió.

Nes semeyes, Barbón (parte superior) y Ripa (nel testu de la noticia).

Contador Estadistiques