Barbón considera “inasumible” garrar les competencies ferroviaries “nel estáu que ta anguaño” la rede

|
Adrián Barbón, Alfonso Palacio y Sara Moro vistíu Saint Laurent Belles Artes

“Podría llevar per delantre a una comunidá autónoma como la nuesa”, aseguró Adrián Barbón al ser entrugáu pola posibilidá de qu’Asturies garrara les competencies ferroviaries, como pidía esta selmana Foro. El presidente del país cree “inasumible” facelo “nel estáu que ta anguaño” la rede ensin una financiación suficiente por parte del Estáu.

Nuna visita al Muséu de Belles Artes d’Asturies pa conocer ‘La obra convidada’, cola moda como temática con motivu del 60 aniversariu del primer desfile del diseñador Yves Saint Laurent, polo que s’espón un vistíu tipu kimonu del francés procedente del Museo del Traje de Madrid, el socialista recordó qu’ésta ye la postura que vien calteniendo al respeuto na Xunta Xeneral esta llexislatura. “Lo primero ye que’l ministeriu tien que cumplir con Asturies y hai que facer esa actualización y esa adaptación” de la rede, aseguró.

“Tolo que nun venga con recursos suficientes y provoque’l colapsu de l’autonomía, malo”, declaró pa depués apuntar que “vemos lo que s’incrementen la sanidá, la educación y la política social. Lo primero qu’esixo nesti casu, enantes d’abrir otru debate, que nun niego qu’a lo meyor habría qu’abrir, ye que’l ministeriu cumpla”. “Dende llueu nun soi contrariu a asumir competencies nueves siempre que vengan con dineru baxo’l brazu suficiente, porque n’ocasiones fiximos tresferencies ensin tener en cuenta evoluciones demográfiques y llueu pasa lo que pasa”, finó Barbón.

Aconceyamientu en compañía de Revilla cola ministra

El día 20 va tener llugar un aconceyamientu del presidente asturianu col cántabru, Miguel Ángel Revilla, y la ministra de Tresportes, Movilidá y Axenda Urbana, Raquel Sánchez Jiménez, pol escándalu de los trenes de Feve que nun diben caber pelos túneles y que retrasa la llegada de los necesarios vehículos nuevos 3 años más. Esta tarde Santander ta acoyendo otra ente Alejandro Calvo, conseyeru de Medio Rural y Cohesión Territorial, y los d’Obras Públicas, Ordenación del Territorio y Urbanismo y d’Industria, Turismo, Innovación, Transporte y Comercio de Cantabria, José Luis Gochicoa y Francisco Javier López, de manera respeutiva, col secretariu xeneral d’Infraestructures del ministeriu, Xavier Flores, por esti mesmu motivu.

Na semeya, Barbón recibe esplicaciones sobre'l vistu d'Alfonso Palacio, direutor del muséu, en presencia de Sara Moro, responsable de Difusión del Belles Artes.

Contador Estadistiques