La Banda Gaites de Corvera d’Asturies asoleya ‘Mólíhuā’, el so segundu trabayu discográficu

Les sensaciones y músiques atopaes pola Banda de Gaites Corvera d’Asturies na so xira per China del añu 2013 salen a flote en ‘Mólíhuā (Flor de xazmín)’, el so segundu trabayu discofráficu tres ‘Al debalu’. El discu garra’l nome d’un tema tradicional chinu popularizáu por una ópera de Giacomo Puccini que la formación tocó nel país asiáticu.

Shanghái, Luoyang o Pekín, con una actuación nel tramu visitable de la Gran Muralla China cercanu a la capital, foron dalgunes de les paraes de la xira de la banda de gaites asturiana más internacional, como amuesa la so presencia añal nel desfile de San Patriciu en New York, o los sos conciertos en Gibraltar, República Dominicana o Francia –onde van tornar esti setiembre–, ente otros munchos llugares. Esa esperiencia en China inflúi en ‘Mólíhuā (Flor de xazmín)’, álbum editáu por L’Aguañaz/Goxe Producciones que presenta un reperoriu variáu, con pieces asturianes, gallegues, bretones, norteamericanes, chines o compuestes pol so direutor Bras Rodrigo, con arreglos que van de los más avezaos y esperables nuna banda de gaites a otros más rompedores, casu de la electrónica ‘Belenia’, o más folkis, como ‘Saint Patrick’s’ o ‘Atlantic Lane’, cola collaboración nes cuerdes de Rubén Bada.

El cantar que da nome al discu, ‘Mólíhuā’, ye una pieza tradicional china que la banda corverana interpretó mientres esa xira del 2013, con un gran recibimientu ente’l públicu llocal, que nun duldó en cantala al son de les gaites asturianes. Esti cantar tien un significáu bien cercanu al nuesu himnu y ye conocíu fuera de les llendes chines gracies a la ópera ‘Turandot’ (1926) de Giacomo Puccini. La cantante Ziwen Chen y l’intérprete d’erhu –violín chinu– Lin Gao collaboren nesti tema.