Aznar diz que la reforma del estatutu nun va iguar los problemes d’Asturies

L'ex - presidente del gobiernu d'España y presidente de la Fundación pal Análisis y los Estudios Sociales (FAES), José María Aznar, y el presidente de la Fundación Melquíades Alvarez y máximu responsable tamién del Partíu Popular d'Asturies, Ovidio Sánchez, van roblar güei un alcuerdu de collaboración col oxetivu de "ufiertar propuestes pa meyorar el futuru d'Asturies". L'alcalde d'Uviéu, Gabino de Lorenzo, tamién asistió a la firma de los alcuerdos ente estes dos fundaciones de pensamientu lliberal.

Aznar fexo un repasu de los datos más negativos sobre la economía asturiana y propunxo como soluciones l'entamu de polítiques económiques que potencien la creación d'empleu al traviés del incentivu a la mediana y gran empresa y de la rebaxa de la fiscalidá "que ye la más alta del estáu". P'aznar los poderes públicos nun han sustituyir nunca a los empresarios, "porque ta demostrao que lo faen fatal". Como rempuesta dende FAES a estes cuestiones, na rueda de prensa diose a conocer que dientro de poques selmanes va echar a andar l'Observatoriu Económicu de FAES, que va dirixir l'economista asturianu Juan Velarde.

L'ex presidente del Gobiernu criticó tamién los retrasos de les infraestructures n'Asturies y negó que los problemes de Asturias vayan iguase cola reforma del Estatutu d'Autonomía, un asuntu nel qu'Aznar aseguró que "nun hai que dexar que s'imponga la voluntá de los más radicales". Aznar, que fexo un llamáu a defender les idees de "llibertá" y de "nación española" aseguró que'l sistema de financiación de les autonomíes aprobáu nel so mandatu dexaba a Asturies "ente les cinco autonomíes meyor financiaes".