Avilés va estrenar el votu electrónicu nel referendum pa la Constitución Europea

El Ministeriu del Interior fizo públicu ayeri'l llistáu de conceyos que van estrenar el e-votu nel referéndum pa la Constitución Europea del 20 de febreru. El criteriu ministerial mandaba que los conceyos participantes, ún por provincia, nun fueren capitales de provincia y que tuvieren un censu que nun llegare a los 100.000 habitantes.

La preba del votu electrónicu va ser esperimental y ensin validez xurídica, entamando güei mesmo y acabando'l 18 d'esti mes, un día enantes de la xornada de reflexón. Los avilesinos van poder emitir por primer vegada'l votu electrónicu ensin qu'ello impida votar na urna'l día 20, anulando automáticamente'l votu "real" al virtual. Pal desarrollu de la preba pilotu del votu virtual van dase unos certificaos dixitales especiales col oxetivu de da-yos a los votantes les máximes garantíes de seguranza. Los votantes van recibir los certificaos nos llugares onde s'asitien los terminales pal rexistru y la emisión de la firma electrónica

La xente empadronao n'Avilés que-y interese participar ha pasar pela Oficina Municipal de Participación, asitiada en Rivero 52-baxu, que ye onde s'apurren los certificaos dixitales. En teniéndolu, el votu pue facese dende cualquier terminal con accesu a internet

D'otra manera, el Conceyu d'Avilés va poner una "urna electrónica" na Escuela de Llaranes. Equí namás van poder votar les 2.047 persones que-yos tocaba facelo nesti centru. El votu per esti sistema tampoco nun va tener valor llegal