Autorizáu un conveniu pa l'aplicación de la LOE n'Asturies

La conseyera d'Alministraciones Públiques y vocera del Gobiernu del Principáu d'Asturies, Ana Rosa Migoya, informó güei de que'l Conseyu de Gobiernu autorizó la firma d'un conveniu de collaboración col Ministeriu d'Educación y Ciencia pa establecer mecanismos de cooperación que sirvan p'apoyar l'apliación de la Llei Orgánica d'Educación (LOE) nel Principáu d'Asturies nel cursu escolar 2007-2008.

En concretu, el conveniu va favorecer iniciatives en cuatro direcciones: formación del profesoráu n'aspectos xenerales de la LOE, apoyu a la creación de la enseñanza y deprendimientu de llingües estranxeres, meyora del éxitu escolar y disminución del abandonu tempranu de la escolarización.

Pa cumplir los oxetivos del conveniu, el Ministeriu d'Educación y Ciencia va aportar 920.678 euros y el Principáu d'Asturies va sumar 1.381.017 más.

En total, nesti cursu van destinase 2.301.695 euros a apoyar l'aplicación de la LOE nel Principáu d'Asturies, de los cuales 305.705 van ser pa impulsar programes de formación del profesoráu, 550.000 pa reforzar la enseñanza y el deprendimientu de llingues estranxeres, 1.212.448 euros pa programes de meyora del éxitu escolar y 233.542 pa iniciatives dirixíes a baxar les bolses d'abandonu tempranu de los alumnos d'Eduación Secundaria Obligatoria (ESO).

Una comisión mista compuesta por seis miembros --tres designaos pol Principáu, dos pol Ministeriu d'Educación y ún pola Delegación del Gobiernu n'Asturies--, va encargase de facer el siguimientu y la evaluación de los resultaos del conveniu.

Per otru llau, tamién s'autorizó la firma d'un conveniu col Ministeriu d'Eduación y Ciencia p'aumentar les places nes Escueles Oficiales d'Idiomes y impulsar la conocencia del inglés ente los mozos de 18 a 30 años.

En virtú del conveniu van establecese en dellos conceyos aules ascrites a una Escuela Oficial d'Idiomes pa impartir enseñanza oficial del inglés, clases de conversación y refuerzu de la comprensión y inglés dirixíu a universitarios. L'alcuerdu ente dambes alministraciones va permitir tamién aumentar el númberu de grupos qu'asiste a clases n'horariu nocherniegu, impartir cursos intensivos y potenciar el deprendimientu del inglés al traviés d'internet.

Pa financiar les actividaes previstes pal 2008, el Ministeriu d'Eduación y Ciencia va aportar 241.000 euros y el Principáu d'Asturies van encargase d'aportar les instalaciones necesaries pa la docencia.

Amás, l'Executivu aprobó güei otru conveniu de collaboración cola Univesidá d'Uviéu pa potenciar el Programa d'ayuda a la Incorporación y Intensificación de l'Actividá Investigadora (programa 13).

En virtú del conveniu, la Conseyería d'Educación comprométese a aportar 250.000 euros pa financiar les actividaes previstes y la Universidá d'Uviéu s'obliga a convocar places pa intensificar l'actividá investigadora nel marcu de la institución.

Per otru llau alcordóse prollongar el conveniu establecíu cola Fábrica Nacional de Moneda y Timbre sobre la edición de Certificaos de Profesionalidá.

El 20 de xunetu del 2005 formalizóse un conveniu de collaboración ente la Cosneyería d'Educación y la Fábrica Nacional de Moneda y Timbre pa la xestión integral y la emisión de los Certificaos de Profesionalidá. Estos documentos acrediten les competencies profesionales mercaes mediante aiciones de Formación Profesional ocupacional y continua, programes de formación y emplegu, contratos de deprendimientu, y pa la formación de la esperiencia llaboral y otres víes non formales de formación, ensin qu'ello constituya regulación del exerciciu profesional.

El Conseyu de Gobiernu aprobó güei la firma d'una adenda que va permitir caltener el conveniu y qu'establez qu'Eduación va abonar 3,50 euros a la Fábrica Nacional de Moneda y Timbre por certificáu recibíu.

Tamién s'aprobó la concesión de delles sovenciones por un importe global de 639.503 euros, destinaes a la compra d'equipamientu científicu-técnicu pa la execución de proyectos d'investigación.

En concretu, va recibir ayudes económiques el Centru Oceanográficu de Xixón (127.000 euros), l'Institutu Nacional del Carbón (123.099 euros), Departamentu de Química Orgánica y Inorgánica de la Universidá d'Uviéu (33.640 euros), Departamentu de Física de la Universidá d'Uviéu (183.764 euros) y Departamentu de Química, Física y Analítica de la Universidá d'Uviéu (172.000 euros).