AUNA faise cola parte d’HC enTelecable

Sabíase dende'l momentu en qu'Electricidade de Portugal mercó Hidrocantábrico que la parte de la empresa eléctrica nel operador de cable asturianu diba salir a la venta. El mesmu Joao Talone, presidente d'EDP, declaró la intención de vender el 46% d'HC en Telecable, y anque nun esclarió en que plazu, en Telecable sabíen qu'ello diba ser enantes del final d'esti 2.004. Dos yeren los candidatos a facese col llambión negociu de les telecomunicaciones n'Asturies, ONO y AUNA, siendo'l segundu'l ganador na puya.

Anque la venta entovía nun ye oficial, representantes d'AUNA yá tan visitando a clientes de Telecable. Na visita preséntense como nuevos dueños de Telecable interesaos en conocer aspectos rellacionaos cola calidá del serviciu y les meyores que-yos prestaría tener nuna toma de contactu col negociu enantes de pasar a exercer el control efectivu sobre la empresa, que na mesma entrevista espliquen que va facese público a la vuelta de les vacaciones de veranu.

Col 46% d'HC en Telecable, AUNA conviértese en sociu mayoritariu de la operadora asturiana n'igualdá con Caxastur, que tien otru 46% mientres qu'Editorial Prensa Ibérica ye propietaria d'otru 8%, anque la entrada d'AUNA pue venir acompañada de más alteraciones nel repartu accionarial. D'otra parte, HC va vender tamién el 35% que tien na operadora Retecal de Castiella y Llión, anque nesti casu'l candidatu meyor asitiáu pa la venta ye ONO, que yá tien un tantu por cientu significativu na empresa. El conxuntu de participaciones d'HC nes dos empreses valorase nunos 80 millones d'euros