Atención especial pa los emigrantes asturianos retornaos

El conseyeru d'Esteriores Javier Valledor dio ayeri un resume de les actuaciones en materia d'emigrantes retornaos a Asturies nel añu 2.004. Valledor esplicó que nel 2004 tramitáronse 145 ayudes pa facer posible'l retornu a Asturies d'otros tantos emigrantes que lo desearon y nun disponíen de recursos propios, los más d'ellos de Venezuela y de l'Arxentina.

El Conseyeru fizo esta anuncia dientro d'una rueda de prensa na que tamién adelantó la creación nsti añu 2005 d'un Observatoriu de la Emigración Retornada que s'encargue de conocer les causes y característiques de los movimientos migratorios de retornu a Asturies. Esti observatoriu ha coordinase tamién coles alministraciones estatales, anque, según sorrayó'l conseyeru, Asturies dispón de cada vez más medios específicos pa esta problemática, pasando de 33.000 euros que s'acutaben nel 2003 pa los emigrantes retornaos a los 163.000 de los que se dispón pa esti 2005, ello amás de disponese de venti places acutaes en residencies de mayores y de viviendes d'iniciativa pública a la so disposición.

El númberu d'emigrantes asturianos que tornaron a casa nel 2.004 foi altu, pasando con bastante de les mil, anque perbaxo de les 1.400 del 2.003. La representante de l'Asociación d'Emigrantes Españoles Retornaos a Asturies, Pilar Burgo, esplicó que los emigrantes que vuelven dende países d'América del Sur faenlo en condiciones económiques llacerioses en comparanza colos que faen el camín de vuelta dende otros países d'Europa