Asturies.com TV presenta "Tamos Fartos" de Lliberdón

La sección de videu d'esti diariu ufierta güei el vídeu d'un cantar del grupu de folk asturianu "Lliberdón". El tema del videu ye'l conocíu "Tamos Fartos" nel qu'al traviés de la música y les imáxenes, el grupu amuesa'l so compromisu pa cola revindicación llingüística n'Asturies.

El cantar ye'l primer corte del que ye hasta'l momentu'l caberu discu de Lliberdón, que s'entitulaba de la mesma manera que'l cantar del videu, "Tamos Fartos". El grupu, llideráu nel vigulín por Daniel Garcia de la Cuesta, tenía naquel 1997 en que s'espublizó'l cd ente los sos componentes a Fonsu Fernández García cola gaita y la zanfona, Antón Barquero na percusión, Lluis García de Benito nes xiblates y Ricardo García na guitarra. Toos ellos son protagonistes nel videu, xunta les imáxenes de la manifestación del Pautu pol Autogobiernu del añu 1996 qu'anduvo les cais d'Uviéu. Asina la música y los músicos de Lliberdón dan son a la imaxe de la revindicación de la oficialidá pa la llingua asturiana.