Asturies.com incorpora les viñetes humorístiques d’Efrén d’Andrés

Efrén d’Andrés (Madrid, 1961) principia esti vienres a collaborar con Asturies.com. Profesor de FP y dibuxante aficionáu con una trayeutoria de 30 años, toles selmanes va espublizar una viñeta humorística na nuesa web.
 
D’esta forma, Asturies.com amplía la so ufierta de conteníos colos trabayos d’un dibuxante d’esperiencia avalada que convalida la so afición col so trabayu como educador. Na so trayeutoria destaca la ilustración de delles espublizaciones, asina como collaboraciones nes páxines de ‘Alitar Asturies’ del diariu El Comercio o na edición impresa del selmanariu Les Noticies. Tamién dispón d'un blog onde espubliza les sos creaciones en llingua asturiana y en castellanu.
 
La primer viñeta de D’Andrés na nuesa web ta dedicada, como nun podía ser d’otra forma, a les eleiciones asturianes que tienen llugar el domingu. Tanto l’autor como la redaición d’Asturies.como esperamos que los nuesos usuarios disfruten d’ella y de les que vamos dir espublizando cada 7 díes de cara a la fin de selmana.