Asturies zarra xineru con 2.624 paraos más y 4.423 cotizantes a la Seguridá Social menos

Xineru nun foi un bon más pa l'emplegu n'Asturies. El país convirtióse nel tercer territoriu onde más medró’l paru, un 3,20 por cientu, lo que significa 2.625 demandantes de trabayu más que’l mes anterior, y l’afiliación a la Seguridá Social baxó en 4.423 cotizantes, una mengua del 1,23 por cientu.

El crecimientu del desemplegu foi superior a la media estatal, que s’asitió nun 1,96 por cientu al sumar 76.216 paraos que ponen el total en 3.964.353. N’Asturies esta cifra ye de 84.694 al incorporar 2.624 más, una medra del 3,20 por cientu que, sicasí, nun ye mayor que la de los cuatro años últimos nesti mes.

Canarias, con un 3,63 por cientu, y Aragón, con un 3,39 por cientu, son les únques que presenten cifres peores esti xineru. Namái baxa’l paru en Galicia (1,90 por cientu), Ceuta (1,57 por cientu) y Illes Balears (1,18).

Dende’l Gobiernu asturianu apunten que la evolución negativa del mercáu llaboral ta venceyada cola incidencia de la tercer fola de la COVID-19 y les midíes adoptaes nel país pa frenar l’espardimientu del coronavirus SARS-CoV-2. Asina, l’incrementu del desemplegu concentróse nel sector servicios, con 2.276 demandantes nuevos, lo que supón cerca del 87 por cientu del aumentu global.

Meyor que la media estatal na evolución interañal

En términos interañales, la medra foi de 11.727 persones, un 16,07 por cientu, menor que la media estatal, que s’asisió nun 21,84 por cientu (710.500 paraos más). Les meyores cifres preséntenles Melilla (4,93 por cientu), Castilla-La Mancha (8,23) y Estremaúra (9,72), y les peores, Illes Balears (36,95), Canarias (32,23) y Catalunya (29,06).

La contratación tamién sufrió una evolución mala n’Asturies, con un descensu del 6,75 por cientu en comparanza con avientu. El númberu de contratos rexistraos, 17.217, quedó mui lloñe de los 28.097 que se fixeron nel mesmu mes del 2020.

Respeuto a l’afiliación a la Seguridá Social, la cantidá de persones cotizantes asitióse en 356.025, 4.423 menos que’l mes anterior (el descensu porcentual foi del 1,23 por cientu). La variación interañal rexistra una cayida de 6.628 persones (1,83 por cientu).