Asturies ye la comunidá menos taurina de la Península

|

En 2014 hubo n’España 15.848 festexos populares con gües bravos, 2.000 más qu’en 2013 - Namás ún foi n'Asturies

Según datos apurríos pol Ministeriu de Cultura, les comunidaes insulares, Canaries y Baleares nun tuvieron en 2014 nenguna actividá taurina. De fechu nes Canaries les corríes -y festexos asemeyaos- tán prohibíes dende qu'aprobara en 1991 la so llei de protección de los animales.

Na Península, Asturies y Galicia encabecen el ranking de les comunidaes menos taurines, con namás un festexu popular caúna, siguíes por Cantabria con 19 y yá más lloñe, Euskadi con 147.

Per otru llau, les comunidaes más aficionaes al usu de gües nes sos fiestes, son Valencia, colos sos “bous al carrer” y 7.866 festexos, siguida lloñe por Castiella y Lleón con 1.862, Navarra con 1.493, Castiella-La Mancha con 1.310 y Aragón con 1.049.

9 muertos

Estes actividaes tán dexando un balance tráxicu nel branu de 2015 con 9 persones muertes tres de ser truñaes por un güe. Ente los finaos hai un asturianu, Venancio Martínez Fernández, que morrió nes fiestes Borriol (Castelló) no que la so familia atalanta como una neglixencia de la organización.

Semeya: @darreuasturies

Contador Estadistiques