Asturies xuega’l so futuru nes urnes

El domingu, 28-M, celébrense n’Asturies eleiciones nacionales, conceyiles y pa parroquies rurales. Asturies xuega’l so futuru nes urnes nuna convocatoria na que les encuestes dan la victoria a Adrián Barbón, con una mayoría del bloque d’izquierda, que, sicasí, llama a la movilización del so eleutoráu, y na que la mirada tará per segunda vez nos 27 diputaos.

A les 9 hores van abrir los colexos eleutorales pa que los ciudadanos depositen el so votu, coles 20 hores como hora tope pa facelo. En total tán convocaes nesta cita eleutoral 958.635 persones, de les que 835.451 residen nel país y 123.184 conformen el coleutivu emigrante, que yá exerció’l so derechu esta selmana.

No que respeuta a les Nacionales, participen 15 partíos o coaliciones políques: FSA-PSOE, PP, Ciudadanos-Partido de la Ciudadanía, Podemos Asturies, Convocatoria po Asturies (IX-Más País-IAS), Foro, VOX, PCTE, Andecha Astur, SOS Asturias-España Vaciada y SOS Occidente, Verdes EQUO Asturias, Suma Principado, PACMA, Partido Unionista del Pueblo Español (PUEDE) y Por un Mundo más Justo (PUM+J). Tolos partíos van poles trés circunscripciones, a esceición de PUEDE y Verdes EQUO, que van namás pola central, y PACMA, que nun participa na oriental.

De les siete formaciones con representación parllamentaria namás repite candidatu la FSA-PSOE, col presidente Adrián Barbón. Les encuestes dan-y como ganador, con mayoría pal bloque d’izquierda, anque los socialistes nun quieren confiances y tán llamando a la movilización del so eleutoráu.

El PP, principal partíu de la oposición, presenta nesta ocasión a Diego Canga, un altu funcionariu de la Xunión Européu que nun taba afiliáu al partíu. El restu de candidatos de les formaciones con representación na Xunta Xeneral son Manuel Iñara (Ciudadanos), Cova Tomé (Podemos), Ovidio Zapico (Convocatoria por Asturies), Adrián Pumares (Foro) y Carolina López Fernández (VOX).

La reforma del Estatutu del Estatutu foi ún de los temes más trataos na campaña eleutoral que fina esta medianueche y, con él, la oficialidá del asturianu, anque non con tanta intensidá como nel 2019. Les postures paecen clares, con cuatro partíos favoratibles a reconocer los derechos llingüísticos de los falantes d’asturianu y gallego-asturiano, los que negociaron ensin alcuerdu nesta llexislatura (PSOE, Podemos, IX-IAS y Foro), pero nun ta claro que se llegue a sumar los 27 diputaos necesarios pa ello.

Na imaxe, tribuna d'oradores de la Xunta Xeneral. Semeya propiedá de la Xunta Xeneral obra de Kike Llamas.