Asturies va tener una fábrica de biodiesel

El combustible biodiesel, un gasoil que sal del reciclao d'aceites vexetales de cocina, va fabricase n'Asturies. Los responsables del nuevu proyectu empresarial, que pretende producir combustible non contaminante, presentaron ayeri les llinies mayestres del proyectu, del que va tiempu que se sabía pero que taba pendiente d'un allugamientu definitivu y de busca-y una rentabilidá que dependía de la reforma de les ayudes fiscales enxertes na llei d'Acompañamientu de los Presupuestos Xenerales del Estáu.

Bionorte, filial de la inxeniería Isastur, va poner la fábrica en Sotrondio, onde se cuenta con tener funcionando la planta pa primeros del 2.004 . Con una inversión de 1,2 millones de euros, que cuenta con ayudes de los fondos mineros y de la Conseyería d'Industria, la planta va reciclar l'aceite vieyo de Galicia, Castilla y Llión y hasta de les Islles Canaries, que va venir en contenedores hasta'l puertu d'Avilés. Lo más interesante del proyectu ye que les 4.000 tonelaes de biodiesel que van salir de la fábrica de Sotrondio van gastales los autobuses urbanos de dellos conceyos asturianos, ente ellos Mieres y Xixón, lo que pue repercutir nuna meyora de la emisión de contaminantes nel tráficu urbanu. L'añu pasáu, l'Axencia Local de la Enerxía del Nalón echó andar un proyectu pilotu en tres llínies d'autobuses de la cuenca, que durante seyes meses funcionaron con biodiesel. El balance oficial de la preba destacó que'l biodiesel llibró a l'atmósfera un total de 56 tonelaes de diósidu de carbono al aforrar 18 tonelaes de petróleu.

El biodiesel ye un carburante fecho con aceites vexetales reciclaos y que, amás de valir pa recuperar estos residuos, contamina muncho menos que'l gasolio normal. L'asturiana va ser la segunda planta de biodiesel nel estáu, depués de que l'otru añu echare a andar la primera en Cataluña, país onde esiste tamién una compañía que se dedica a la distribución del biodiesel (mecío con gasoil mineral) en gasolineres comerciales.El líder mundial del biodiesel ye Alemaña, onde más de 1.500 gasolineres venden biodiesel más barato que'l del gasoil normal gracies al marcu fiscal especial que beneficia a esti combustible. Francia tamién ta espardiendo l'usu del biodiesel, anque los franceses mézclenlo con un 5% de gasoil mineral.