Asturies va promocionase como destín gastronómicu n’Enotur

Esta fin de selmana va celebrase en Madrid el Salón Internacional de Enoturismo y Turismo Gastronómico (Enotur). Asturies va facer un esfuerzu pa promocionase como destín gastronómicu nesta feria que reúne a unes 5.000 persones.
 
La Conseyería d’Economía y Emplegu, al traviés de la Sociedad Regional de Turismo (SRT), va presentar al públicu castellanu y visitantes l’abanicu d’esperiencies de turismu gastronómicu qu’ufre’l país col oxetivu d’atrayer visitantes pa la ponte del 1 de mayu y les fines de selmana de primavera, de manera principal, amás de pa consolidar a Asturies como un destín afayaizu pa los amantes de la bona comida y del vinu, cola referencia importante que supón el Vinu de Calidá de Cangas. Pa ello, según informa’l Gobiernu, ellaboróse un dossier específicu de propuestes que va distribuyise de forma electrónica a los turistes que tán na base de datos que manexa la SRT y, en papel, a los visitantes de la feria que va desarrollase del vienres al domingu nel Palacio de Congresos de Madrid, frente al Santiago Bernabéu, estadiu nel que va xugar el Sporting el sábadu (20 hores) con una bona presencia de siguidores asturianos.
 
Ente les iniciatives de promoción destaca la propuesta 'Cocina & Sueña en Asturias', ellaborada pola Asociación de Casas de Aldea (ARCA). Esta oferta inclúi estancies de fin de selmana con talleres de cocina impartíos por profesionales de renome y visites a productores agroalimentarios. D’igual forma, Asturies va disponer d’un stand nel que, amás d’atopar infomación turística, los visitantes tamién van poder acceder al 'Paseo del Sabor' nel que los conseyos reguladores asturianos van ufrir quesos, vinos y dellos palos de sidra. Llueu, la xente interesao podrá mercalos nel 'Espacio Tienda y Tapa'. D’esta forma los conseyos reguladores y el Gobiernu mantienen la collaboración aniciada en Fitur, y continuada en Gourmetur, que permite la promoción, al mesmu de tiempu, del turismu nel país y de los nuesos productos agroalimentarios.