Asturies queda ensin eventos taurinos al denegase l'autorización pa la plaza portátil de la ‘novillada’ de Cangues

|
Plaza portátil en Mestas de Con voltiada

El Ministeriu pa la Transición Ecolóxica y el Retu Demográficu, al traviés de la Confederación Hidrográfica del Cantábricu, refugó l'autorización pa la instalación de la plaza de toros portátil onde diba celebrase la ‘novillada’ de Cangues d'Onís el domingu. Asturies queda, poro, ensin eventos taurinos llueu de la decisión de Xixón de desaniciar la so feria.

La organización de la corrida clasificatoria pal Circuito de Novilladas del Norte presentó ayeri pela tarde’l permisu nel Conceyu pal usu d’una finca privada en Mestas de Con y esta mañana la Confederación Hidrográfica refugaba l'autorización llueu d'una denuncia al tar catalogada ésta como zona con posibilidá alta d’enllenos. Cola plaza yá práuticamente instalada, too paez indicar que l’eventu nun va poder celebrase dada esta situación y el pocu marxe esistente p’atopar otru llugar pa desendolcalu.

“Tamos mui contentos. Ye un gran ésitu, salvamos la vida de seis nuviellos”, celebra José Cidoncha, ayalgueru d’Huellas del Sella, coleutivu qu’entregó ayeri les más de 55.000 firmes contra esti eventu recoyíos nuna iniciativa entamada por Víctor Manuel Iglesias na plataforma Change.org, que yá suma 57.300 sofitos. “Foi muncha llucha, na que tuvimos l’apoyu de la conceyala de Xuníes Podemos, David contra Goliat”, añade.

Mañana a les 8.30 hores ta programáu un Plenu municipal estraordinariu centráu na ‘novillada’. Darréu, al meudía, ta convocada por esta asociación protectora d’animales una concentración nueva frente a la Casa Conceyu, que se caltién.

“Agora hai que trabayar por desaniciar los toros dafechu. Ye salvaxismu”, critica al tiempu que refuga’l fechu de que “los menores de 10 años teníen accesu de baldre acompañáu d’un adultu que pagara los 18 euros de la entrada, dalgo que se debería denuncia al Defensor del Menor”.

Ensin Feria Taurina de Begoña nel 2022

Esta denegación del permisu llega un día depués de que l’alcaldesa de Xixón, Ana González Rodríguez, anunciara la so decisión de nun prorrogar el contratu de concesión de la plaza de toros d’El Bibio con Circuitos Taurinos y de nun sacalu más a concursu. Na práutica, el fin de la Feria Taurina de Begoña llueu de 133 años de corríes.

Ésti yera l’únicu eventu taurín organizáu n’Asturies nes décades últimes, cola esceición de la ‘novillada’ de Cangues del domingu, agora paralizada, polo que’l país queda llibre d’esti tipu de ‘festexos’.

Na imaxe, un momentu de la instalación de la plaza portátil. Semeya propiedá de l'Asociación Nacional Animales con Derechos y Libertad (ANADEL), ún de los coleutivos convocantes de la primer concentración contra la 'novillada' en Cangues.

Contador Estadistiques