Asturies, protagonista nel San Patriciu neoyorquín

Dende mañana xueves una delegación asturiana va participar nel desfile del día de San Patriciu de Nueva York, onde va tomar parte nos actos oficiales del Día de la comunidá irlandesa

Conciertos de bandes de gaites asturianes, llectures de poesía, música tradicional y unes xornaes sobre cultura asturiana en collaboración cola Pace University de NY van centrar la presencia asturiana nel 246 desfile de San Patriciu.

Les bandes de gaites de Corvera, Gozón y la "Villa de Xixón" van ser les formaciones asturianes que participen nel desfile neoyorquín, nel que tomen parte más de 350 formaciones dfe gaites, convidaes pol mesmu director xeneral del certame, John Dunleavy. El San Patriciu de NY ye l'eventu más multitudinariu que se celebra en tol mundu con motivu de la efeméride d'esti santu irlandés. Convidaos pola organización del acontecimientu en calidá de nación atlántica, una delegación asturiana participa tolos años dende'l 2005 nel desfile de la 5º Avenida de la ciudá americana.

Xunto col desfile, la cultura asturiana va er tamién protagonista, celebrando la Pace University de Nueva York el próximu 16 de marzu una xornada intensiva sobre la llingua y cultura asturianes coincidiendo colos actos del Día de San Patriciu.

L'Asociación Asturianos en USA, que preside el profesor del Rollins College Alberto Prieto Calixto y que recupera la herencia de los asturianos emigraos a los EEUU ye la entidá qu'organiza esta xornada na que collaboren l'Academia de la Llingua Asturiana y la Conseyería de Xusticia y Rellaciones Esteriores del Gobiernu asturianu.

El profesor de la Pace University Andrés Villagrá va ser quien inaugurare la xornada, falando sobre la emigración na literatura n'asturianu, interviniendo darréu l'académicu de la llingua Pablo Xuan Manzano. La representante del consuláu Pilar Fernández va falar sobre la recuperación de la cultura asturiana nos Estaos Uníos, mientres que'l mesmu Alberto Prieto Calixto va encargase de dar una charra sobre la presencia asturiana nos Estaos Uníos. La segunda mesa de trabayu del día va entamar con una charra sobre la web www.asturianus.org que cumple un importante papel de puntu de contactu de la comunidá d'asturianos y descendientes d'asturianos nos EEUU. Paquita Suárez Coalla, que va falar sobre les muyeres del campu asturianu y l'escritor y periodista Chema Vega, que va dar un recital de poesía acompañáu pol gaiteru Bras Rodrigo, completen esta xornada.