Asturies métese pel software llibre

El Principáu d'Asturies podría convertise na segunda autonomía n'adaptar el sistema Linux pa l'alministración, siguiendo'l camín d'Extremadura, que trabaya dende va tiempu nel LinEx, la so propia distribución de Linux.L'alministración asturiana gasta tolos años munchos miles d'euros en pagar los permoisos que tien d'abonar pa emplegar el software propietariu de la casa Microsoft. Esto, y el fechu de que los programes de la casa de Redmond nun tengan l'adaptabilidá que puen tener los programes de códigu abiertu desarrollaos por programadores independientes, ta llevando a l'alministración autonómica a atender a lo que yá ye una corriente que siguen bien d'alministraciones en conceyos, autonomíes y hasta estaos, como ye'l casu de Portugal. L'alministración astur podría adoptar como modelu la distribución de la Junta de Extremadura, autonomía d'idénticu signu políticu que l'asturiana y que foi pionera, yá va dellos años, n'adoptar software llibre. Con too y con ello, el software llibre yá entró n'alministración asturiana per otros calces. Va dos meses, l'ayuntamientu de Villaviciosa aprebó una moción que presentó Izquierda Asturiana al través del conceyal asturianista Mundo Collada pa que'l conceyu se metiere pel software llibre. Una moción semeya a esta va debatise precisamente esta tarde nel plenu del Ayuntamientu de Nava, defendida pola agrupación asturianista de Nava.