Asturies ganó a Suiza nun gran partíu de h.oquei

Asturies ganó a Suiza pol resultáu de trés a dos nel partíu internacional d'h.oquei patinos xugáu ayeri en Grau. L'alcuentru foi mui disputáu nos sos primeros venticinco minutos y fino con empate a dos, na segunda parte'l dominiu del equipu asturianu foi cuasi total y los xugadores de Benchi Garrote llanzáronse al ataque p'algamar el trunfu. L'equipu suizu, que quedare subcampeón -tres d'España- nel últimu Campeonatu d'Europa, derrotando a Italia na semifinal, vieno a Asturies con una amestadura de xugadores veteranos y otros más mozos.


Nel primer tiempu Asturies dominó, anque Suiza yera mui peligrosa colos sos contraataques. Los locales pudieron ponese delantre nel marcador con un penalti, nel minutu dos, pero Esteban Guerra llanzó la bola al palu. Esti mesmu xugador foi l'encargáu d'abrir el lletrónicu nel minutu once tres una bola que-y dexó Toni Sánchez.
Guerra taba mui activu y tuvo dos ocasiones pa enanchar la ventaya, pero un penalti tresformáu por Matthieu Brentini truxo l'empate. Dos minutos dempués Asturies volvió a ponese delantre con un tantu de Keko a pase d'Esteban Guerra. L'equipu asturianu tuvo la posibilidá de poner el trés a ún nel lletrónicu pero Toni Sánchez falló otru penalti nel minutu dieciocho. Volvió a empatar Suiza con un tantu de Matthieu Brentini y los foriatos entá tuvieron la posibilidá de ponese delantre primero con una falta direuta qu'Israel paró-y a García Méndez y dempués con otru penalti que'l porteru asturianu-y paró a Brentini a menos de dos minutos pal descansu. Na suiguiente xugada Raigoso llanzó la bola la palu.


Nel segundu tiempu'l dominiu foi del equipu asturianu y les ocasiones yeren entovía muncho más clares, asina Javi Sama tuvo una mui evidente que falló y na que'l rechace nun lu foi a meter Esteban Guerra. Los suizos siguíen siendo mui peligrosos coles sos contres, espetando Brentini una bola en palu. Los dos equipos buscaben la victoria y hebo unos minutos nos que les ocasiones yeren alternes d'un y otru equipu.
El dominiu volvió a ser asturianu y Guerra y Estanis volvieron a tener bones ocasiones pa marcar. Nel minutu trenta y siete sacáron-y tarxeta azul a Brentini, la figura de los suizos. El xugador tuvo que dir al bancu dos minutos y el so equipu notólo, pues los asturianos acorripiaron a los suizos nel so campu. Raigoso y Estanis tuvieron un par de bonos remates, que cuasi entren. Toni Sánchez fizó una gran xugada que merecía'l tantu, y Raigoso llevantó demasiao la bola. Ello obligó al entrenador suizu a pidir tiempu muertu, pero nun amenorgó'l dominiu local, tán descaráu que Javi Sama tuvo cuatro ocasiones siguíes pa marcar. Los suizos defendíen mui bien y pegábense muncho a los asturianos pa nun-yos dar marxe de maniobra. Tanto forzaben la defensa que cuando faltaben dos minutos ventitrés segundos Brentini fizo un penalti qu'el veteranu Estanis foi l'encargáu de convertir faciendo'l trés a dos que ya diba a ser definitivu.


Ficha téunica:


Asturies: Israel, Javi Sama, Estanis, Esteban Guerra y Toni Sánchez. Tamién xugaron: Diego Raigoso, Keko, José Abella y Mario Cuervo. Nun xugó'l porteru Adrián, anque taba nel bancu.


Suiza: Langenegger Roman, Federico García Méndez, Matthieu Brentini, Gaël Jiménez y Simon Von Allmen. Tamién xugaron:Marc Solioz, Kilian Leuenberger, Rolf Luthi, Manuel Von Allmen y Guillaume Oberson (porteru).


Árbitriu: Alberto Garrote. Sacáron-y tarxeta azul por acumulación de dos marielles a Matthieu Brentini, que foi castigáu con dos minutos d'espulsión. Enantes del alcuentru tocáronse los himnos d'Asturies y Suiza. L'himnu asturianu foi cantáu por trés miembros del coru de Grau acompañaos pola banda gaites Camín de Fierro. El partíu xugóse nel Polideportivo Municipal de Grau que taba enllenu.
Marcador: 1-0 (Esteban Guerra, minutu once), 1-1 (Matthieu Brentini de penalti, minutu quince), 2-1 (Keko, minutu diecisiete), 2-2 (Matthieu Brentini, minutu ventitrés) y 3-2 (Estanis de penalti, minutu cuarenta y ocho).