Asturies, Galicia y Cantabria roblen un protocolu “pa impulsar un cluster d’enerxía eólico marino”

|
Enrique Fernández Rodríguez firma conveniu cluster enerxía eólico marino en Santander

“La xunión fadrá la fuercia”, espresó Enrique Fernández Rodríguez, conseyeru d’Industria, Emplegu y Promoción Económica, llueu de roblar en Santander un protocolu con Galicia y Cantabria “pa impulsar un cluster d’enerxía eólico marino”. Pretende la instalación de parques y potenciar la fabricación de componentes pa esta industria.

Los gobiernos d’Asturies, Galicia y Cantabria, representaos polos responsables d’Industria, Fernández Rodríguez, Francisco Conde y Javier López Marcano, de manera respeutiva, pautaron collaborar pa promover el desenvolvimientu de les teunoloxíes y les cadenes de valor asociaes a la enerxía eólico marino, ratificando asina los compromisos soscritos a lo último de xunu polos presidentes de les trés comunidaes pa impulsar l’aprovechamientu d’esti recursu enerxéticu como elementu tresformador y de sostenibilidá del texíu empresarial nel marcu de la llamada Estratexa Europea de Crecimientu Azul.

Les trés alministraciones consideren qu’énte les perspectives de medría de la enerxía eólico marino nos años venideros y dada la importante actividá d’investigación, de desenvolvimientu de prototipos y la presencia d’una industria incipiente de fabricación d’equipos y componentes, ye conveniente esplorar víes de collaboración. Amás, paez-yos necesario “que se procure un aprovechamientu razonable y sostenible” d’esta fonte d’enerxía “con respetu y compatibilidá coles actividaes preexistentes”.

Estratexa de Transición Enerxética 2030

Consideren que la demarcación noratlántica –la costa cantábrica y la costa atlántica gallega– ye una zona con munchu potencial eólicu, de los más importantes d’Estáu, y tienen en cuenta que nes comunidaes del norte atópase’l segundu centru de fabricación de componentes pa parques eólicos marinos d’Europa. Nel casu d’Asturies, según señala Fernández Rodríguez, la enerxía eólico, y en particular la eólico marino, ye “una de les pieces clave p’algamar los oxetivos de transición enerxética, impulsu de l’actividá económica y la descarbonización de la nuestra economía”.

La Estratexa de Transición Enerxética 2030 contempla nún de los sos escenarios un oxetivu d’instalación nes costes asturianes de 770 MW de parques eólicos marinos nesi añu, pa lo que planifíquense dos fases: una primera d’instalación de parques esperimentales, de non más de 50 MW, onde se realicen les validaciones oportunes de les teunoloxíes flotantes que s’instalaríen depués en parques comerciales, en concreto dos con una potencia total de 100 MW, y una segunda fase, yá de desenvolvimientu comercial, pa que nes zones de costa identificaes como más amañoses tean funcionando unos 670 MW nel 2030. Otra manera, la firma del protocolu de collaboración ente les trés autonomíes coincidió cola presentación d’una allianza estratéxica ente les axencies y clusters enerxéticos d’Asturies, Cantabria y Galicia pa impulsar el llamáu Supercluster Atlantic Wind (SAW).

Na semeya, Fernández Rodríguez de pie, al igual que los conseyeros de Cantabria y Galicia, López Marcano y Conde, de manera respeutiva, con miembros del SAW sentaos delantre.

Contador Estadistiques