Asturies foi la comunidá autónoma de menor crecimientu demográficu nel 2006

La población asturiana aumentó en 261 persones, pasando de 1.076.635 nel 2005 a 1.076.896, lo que nin siquiera supón una xuba del 0,1%, acordies cola revisión del padrón del Institutu Nacional d'Estadística (INE) anque, con too y con ello, la capital asturiana, Uviéu, foi una de les capitales que se movieron na media española, presentando una xuba poblacional del 1,3% y pasando de 212.174 habitantes a 214.883, mientres que Xixón sigue como'l conceyu más pobláu con 274.472 habitantes. En total son dieciséis los conceyos asturianos que nun lleguen a los mil habitantes, con Tameza pesllando la llista colos sos 190 habitantes.

Extremadura ye la segunda comunidá de menor xuba demográfica, amestando un 0,2% que l'asitia nos 1,09 millones d'habitantes. Comunidaes como Cantabria presentaron xubes de población del 1%, mientres que Murcia foi la que tuvo más medria de población en términos relativos, con un +2,6% que la fexo pasar de 1.335.792 a 1.370.306 persones. Les autonomíes yá más poblaes, casu de Madrid, Cataluña o la Comunidá Valenciana presentaron tamién datos positivos de población que van dende'l +0,7% de Madrid, perbaxo de la media del estáu, al 1,6% d'Andalucía, el +2% de Cataluña y el +2,4% de la Comunidá Valenciana.