Asturies encabeza la promoción turística en redes sociales

|

'Turismo Asturias' ocupa la segunda plaza en Facebook, namái superáu pol perfil catalán.

La promoción turística diseñada pola Conseyería d'Emplegu, Industria y Turismu consiguió sobrepasar los 235.000 siguidores nes redes sociales, lo qu'asitia a Asturies nún de los primeros puestos del Estáu nesti tipu d'estratexes. Nel casu de Facebook, el perfil 'Turismo Asturias' ocupa'l segundu llugar nel ranking de comunidaes autónomes, tan sólo per detrás de Cataluña.

Coles mesmes, Asturies lidera los principales indicadores d'interaiciones colos usuarios y ye'l territoriu que más 'Me gusta' y comentarios xenera nesta rede social, amás d'encabezar el llistáu de conteníos compartíos. El direutor xeneral de Comerciu y Turismu, Julio González Zapico, atribúi bona parte del ésitu de la promoción turística en llinia al usu de les redes sociales como xeneradores de conteníos.

“La estratexa d'allugamientu turísticu n'Internet va siguir siendo ún de los apuestes más relevantes nel 2016, polo que se va reforzar la comunicación y promoción nesti entornu, facilitando l'usu d'estes canales per parte del sector turísticu”, señaló.

Portal turísticu

Asturies tamién dobló'l númberu de visites al portal turismoasturias.es mientres los dos primeros meses del añu, hasta algamar les 229.608 visites úniques, un 101 por cientu más que nel mesmu periodu del 2015. El llanzamientu d'esti portal nel 2014 supunxo l'apueste decidíu del Gobiernu asturianu pola promoción turística nel entornu dixital. De magar, rexistró 2.671.239 visites úniques.

El portal ta nun procesu permanente de meyora, lo que dexa optimizalu pa facelo más afayadizu y amigable. Ente les actuaciones realizaes destaca'l refuerzu de los conteníos, con numberoses ufiertes a disposición de los turistes, que pueden descargar, ente otros, mapes, guíes y folletos temáticos. Tamién se fomentó la presencia de los establecimientos turísticos y púnxose en marcha un espaciu nuevu dedicáu a la comercialización d'ufiertes y escapaes.

Amás, Turismu ameyoró l'axenda web coincidiendo cola Selmana Santa, con una medría notable na información de conteníos turísticos y culturales que se desenvolvieron mientres estos díes n'Asturies.

Contador Estadistiques