Asturies celebra’l XXXII Día de les Lletres Asturianes

|

L’actu académicu del Teatru Campoamor (20.30 hores) va centralizar les actividaes del XXXII Día de les Lletres Asturianes que se celebra esti vienres. Nél, José Ramón Morala va ser nomáu académicu d’honor y Chechu Rubiera, homenaxeáu.
 
Sonia Avellaneda y Próspero Morán van ser los encargaos de conducir l’actu del Campoamor, que va aniciase cola actuación del cantante de tonada José Manuel Collado y el gaiteru Óscar Fernández González. Darréu d’ello, va tener llugar una xunta estraordinaria de l’Academia de la Llingua Asturiana (ALLA) na que va acoyese como académicu d’honor al profesor José Ramón Morala Rodríguez, catedráticu de la Universidá de Lléon. L’ALLA premia asina la trayeutoria d’esti estudiosu del dominiu llingüísticu ástur al sur del cordal, n'especial sobre la so documentación romance medieval.
 
De siguío, el ex ciclista y téunicu de la Federación de Ciclismu del Principáu d’Asturies, José Luis Rubiera Vigil, más conocíu como Chechu Rubiera, va recibir un reconocimientu públicu “pol so llabor d'encontu a la llingua y cultura del País”, señalen dende l’ALLA. Por último, la presidenta de l’Academia, Ana María Cano, va lleer el so tradicional discursu institucional, pa depués zarrar l’actu cola actuación del grupu musical Xera.
 
Amás del actu académicu, tol país va vivir actividaes relacionaes cola llingua nesti Día de les Lletres Asturianes. Asina, dientro de les actividaes oficiales de la Selmana de les Lletres Asturianes, va descubrise una placa n’alcordanza de Manuel d’Andrés Fernández, ‘Mánfer de la Llera’, a les 11 hores na cai que lleva’l so nome nel barriu de La Llera, en Sama. Al meudía, los escolinos y escolines del IES Cuenca del Nalón van presenciar la entrega de los premios del XVI Concursu de Poesía y Dibuxu y del VIII Concursu de Cartelismu, y l’actuación del grupu Duerna. Mentes, nel resto de colexos del país, los alumnos y alumnes de llingua asturiana tamién van celebrar actividaes relacionaes con esta xornada tan especial pa les nueses lletres.

Contador Estadistiques