Asturiana Mining Company, na inauguración de la esposición polos 25 años del Conciertu pola Oficialidá

Esti martes va inaugurase n’Uviéu la esposición ’25 años de conciertu en cartelos’ qu’entama la XDLA coincidiendo col vixesimoquintu aniversariu del Conciertu pola Oficialidá. Asturiana Mining Company va interpretar dellos cantares.

La muestra va tar abierta al públicu hasta’l vienres, yá que’l sábadu Xixón (19.30 hores, Parque de los Hermanos Castro/Parque Inglés) va acoyer el conciertu que la Xunta pola Defensa de la Llingua Asturiana (XDLA) entamó nel 1989 “pa dar a conocer d'una manera festiva, al empar que reivindicativa, la esixencia de la oficialidá como mediu pa garantizar los derechos llingüísticos de los asturianofalantes”. Asina, les persones que s’averen a la Plaza’l Pescao van poder ver los cartelos de les 25 ediciones, amás d’entraes vieyes y semeyes d’un conciertu pol que pasaron alredor de 70 grupos, dalgunos tovía activos, otros desapaecíos, asina como cantantes de tonada y bandes de gaites.

“El compromisu de la xente de la música asturiana, que collaboró de manera desinteresada, foi fundamental pa qu'esti conciertu fore posible añu tres añu y la XDLA quier reconocelo con un homenaxe”, que tendrá llugar esta tarde a les 20 hores, coincidiendo cola inauguración de la muestra. Amás, va presentase nel actu’l XXV Conciertu pola Oficialidá, que nesta edición va contar cola presencia de N'Arba, Felpeyu, La Tarrancha, La Bandina, Dixebra y Dani Stylo. Les entraes yá tan a la venta de manera anticipada por 8 euros –10, na puerta– nos establecimientos siguientes: L’Esperteyu y Cervecería Mala Strana (Uviéu); Café Trisquel y Sidrería Canteli (Xixón); El Cafetón y Queen Maeve (Avilés); La Gueta (Candás); Mesón Cervantes (Tinéu); El Azul (Cangas); L’Abellugu (Mieres); La Palmera (La Pola Ḷḷena); Abre César (La Pola Siero); Pub Piero’s (Grau); La Traviesa (L’Infiestu); y el CSA La Semiente (L’Entregu).

Pa zarrar l’actu inaugural de la esposición ’25 años de conciertu en cartelos’, l’Asturiana Mining Company va interpretar dellos cantares, actuación a la que va siguir un pinchéu. L’horariu de la muestra na Plaza’l Pescao va ser de 11 a 14 hores y de 18 a 21 hores, siendo’l día caberu de visita’l vienres.