Asturex entama una campaña pa promocionar los quesos artesanos asturianos nos Estaos Xuníos

Los quesos artesanos asturianos van tar presentes na feria Summer Fancy Food que va tener llugar en Washington DC del 10 al 12 de xunetu. Asturex entama esta campaña de promoción qu’inclúi una web y marketing nes redes sociales.
 
Nesti proyeutu de la Sociedá de Promoción Esterior Principáu d’Asturies (Asturex) participen 18 queseríes artesanes, l’Asociación de Quesos Artesanos d’Asturies y les comercializadores de productos asturianos del sector. Gracies a esta collaboración, Asturies va disponer na feria de la capital estauxunidense d’un stand de 18 metros cuadraos onde los visitantes van poder prebar 40 variedaes de quesos del país.
 
Amás, aprovechando la presencia en Washington DC del cocineru asturianu José Andrés, ‘Cheese from Asturias’ va ser protagonista d’una cena con importadores que va tener llugar nel restaurante Jaleo y nel llibru de tapes diseñaes pol de Mieres. D’esta forma, los quesos asturianos van completar una promoción importante nun país onde, poco a poco, los productos del país tán ganado sitiu nos mercaos, n’especial nes tiendes ‘gourmet’. Hai que destacar que Summer Fancy Food trátase de la feria estival d’aliementos ‘delicatessen’ más importante de la costa este del país norteamericanu.