Astur Paredes y Adolfo García Martinez presenten "la casa tradicional asturiana"

L'etnógrafu y investigador Ástur Paredes y l'antropólogu Adolfo García Martinez presentaron ayeri'l llibru "La Casa Tradicional asturiana" editau gracies al patrociniu de la entidá financiera Caxastur. La Casa Tradicional asturiana quier espeyar la casa asturiana como una estructura económica y social , analizando conceptos como la estructura productiva de la casa, amás de les estremaes tipoloxíes y un estoyu fotográficu de los meyores exemplos que se caltienen per tola xeografía asturiana.

Ástur Paredes comentó qu'ún de los oxetivos del llibru y que rescampla nes semeyes que lu acompañen "ye'l choque que se ve ente les cases tradicionales asturianes conviviendo a pocos metros con construcciones de xalés". Paredes dio una visión negativa enforma sobre l'atención que se-y da a l'arquitectura tradicional asturiana y afirmó qu'asistimos a "la destrucción acelerada del patrimoniu a lo llargo de los últimos 25 años" dalgo que, "a llargu plazu va convertise nuna auténtica perda del patrimoniu".