Asoléyense dos llibros sobre árboles d'Asturies

Preséntase güei en Xardín Botánicu de Xixón la obra "Arboles y arbustos naturales de Asturias" del médicu José María Fernández Díaz-Formentí,que tamién ye un apasionáude la botánica con trabayos espublizaos enrevistes como National Geographic, Natura o Geo.

Editada por Caxastur, esta obra enxerta 700 semeyes coles especies d'árboles y matos autóctones d'Asturies y tamién les d'aniciu alóctonu pero que tan presentes anguaño nel nuestru mediu ambiente. El llibru consta d'un capítulu introductoriu sobre los ambientes en que vive cada especie, un segundo qu'analiza la evolución del paisaxe forestal asturianu dende'l Xurásicu hasta la era contemporánea; unes tables pa identificar les especies d'árboles y de matos poles sos característiques y fiches de cada especie.

D'otra manera, el l xeólogu Laureano Merino Cristobal presentó esta selmana en Muséu Nacional de Ciencies Naturales de Madrid, el llibru "Usos tradicionales de los árboles en el Occidente de Asturias" esta obra, que s'enconta nun estudiu rigorosu fechu a partir d'un trabayu de campu en cinco conceyos de la comarca, recueye los usos tradicionales que se-yos dan a los árboles nel occidente asturianu, atropando los testimonios d'espertos, artesanos y xente de los conceyos de Valdés, Cuideiru, Tinéu, Salas y Ayande sobre un total de 40 especies d'árboles que s'usen con propósitos distintos pol home. Asina, el llibru céntrase nel estudiu de los usos que se faen d'elementos como la resina, la corteya o la fueya de dellos árboles y matos pa remedios tradicionales, amás de los usos del frutu de los árboles na gastronomía.