Asociaciones ecoloxistes denuncien al Principáu énte la UE

Les asociaciones Grupu Ornitoloxía Mavea, Colectivu Ecoloxista d'Avilés y la Coordinadora Ornitolóxica d´Asturies tan acabantes de presentar un escritu énte la UE pa evitar la destrucción parcial del Monumentu Natural de Zeluán, en conceyu d'Avilés. Según espliquen estes organizaciones, el Principáu alcordó la declaración de Zeluán como Monumentu natural en 1994 pero l'anuncia oficial de la declaración retrasose hasta l'añu 2.002, siendo nesti intre de cerca d'ocho años que l'Autoridá Portuaria d'Avilés fizo nel 2001 una concesión a la empresa "Astilleros Ría de Avilés S.L.", pa qu'enencharen los cais onde atraquen los barcos.

Esta concesión suponía metese a ocupar 4 hectaries del total de venti que tien Zeluán, incompatibilidá que s'iguó dende l'alministración metiéndo-y tixera al Monumentu Natural pa separtar les sos llendes fuera de l'ampliación pa los remolcadores. Contra esta reforma, les asociaciones conservacionistes yá presentaren en xineru d'esti añu alegaciones énte'l Principáu, pero l'executivu autonómicu refugoles toes, motivu que lleva agora a estes asociaciones a presentar quexa énte'l Comisionáu Européu de la Dirección Xeneral de Mediu Ambiente, Georges Kremlis, aprovechando que los Monumentos Naturales del Principáu tienen tamién tienen la protección de les lleis comunitaries.

Nes alegaciones que presentaren en xineru, los ecoloxistes denunciaben qu'aparte de la importancia que tien pa los páxaros, la parte que se dexó pa los remolcadores ye l'únicu sitiu en que s'atopen el Pholas dactylus y el Ligia oceanica, dos moluscos bien raros de ver, ello aparte de ser Zeluán un llugar d'importante diversidá biolóxica pel que pasen hasta 4.000 páxaros tolos díes.