Asociaciones de consumidores convoquen un “día ensin móviles”

Asociaciones de consumidores y sindicatos convoquen pa güei, día 1 de marzu, el día ensin movil, una iniciativa popular cola que se pretende que los consumidores apaguen los sos móviles en protesta pola xuba de tarifes anunciada poles trés principales operadores. Los convocantes, que cuenten col sofitu de les asociaciones del Conseyu de Consumidores y Usuarios (CCU), consideren que les xubes suponen una "burlla" a la llexislación nueva que desanicia la práctica del redondéu na facturación, una práctica cola que les compañíes recauden ente 800 y 1.000 millones d'euros al añu.

Les organizaciones de consumidores albidren un posible "pautu" ente les compañíes de telefonía que baltaría'l conceptu de llibre competencia, en cuantes que les trés grandes anunciaron xubes asemeyaes y cuasimente al empar na cuota de llamada d'alredor del 25%, polo que solicitaron la investigación del Serviciu de Defensa de la Competencia. Sindicatos como UXT y entidaes como l'Asociación d'Usuarios de Banca, Caxes y Seguros (Adicae) manifestaron el so sofitu a la movilización y propunxeron la creación d'una Plataforma pa combatir les xubes de tarifes.