Areces enfótase en qu'ALSA va facer una operación buena p’Asturies

Nuna entrevista que-y concedió ayeri a Radio Nacional, el Presidente asturianu declaró que "ALSA nun va desprendese de la so vocación d'Asturianía". En plenu revolvúin mediáticu pola posible vienda de la empresa asturiana a una multnacional inglesa del tresporte, el presidente aseguró énte los micrófonos de RNE que tien información de la mesma empresa ALSA y qu'esta quier una alianza y integración nun grupu qu'opera nel conxuntu d'Europa, pero qu'ello nun quier dicir que la empresa asturiana vaya perder pesu n'Asturies, aludiendo a la "Asturianidá" de Pepe Cosmen y la so familia, titulares de la empresa ALSA. Areces ve en cualquier casu qu'ello va ser "una operación positiva p'Asturies" y enfótase en que vaya salir bien.

Na entrevista tratáronse otros temes como l'aprebación del Salariu Social, del que se congració'l presidente como "un avance necesariu na creación d'una solidaridá más necesaria" o el futuru de la regasificadora del Musel, nel qu'echó contra l'aterior gobiernu central del PP por descartala nel Plan Enerxéticu, anque ún de los asuntos nos qu'Areces tuvo palabres más fuertes foi nel de la oposición de vecinos y colectivos ecoloxistes y políticos a les llinies d'alta tensión. Areces dixo sobre ello que tenía que "fiase de la sensatez porque d'otra manera nun se onde díbemos parar" esplicando que nun vía "pa nada razonable que la xente s'oponga y nun quiera que pase per niegún llugar la lilnia". Areces emponderó l'actitú de grupos ecoloxistes como FAPAS que propunxo trazaos alternativos pa la llinia Lada-Velilla y la de la mesma empresa promotora de les llinies asegurando que "Rede Eléctrica Española fizo un esfuerzu importante p'asumir munches reivindicaciones"

Les duldes d'Areces sobre l'estatutu d'autonomía catalán ocuparon tamién un bon cachu de la entrevista, asegurando Álvarez Areces que "El lliderazgu del presidente Zapatero va llevar a bon puertu tolo que tien d'iguase nesi estatutu catalán" entornando dellos elementos "de constitucionalidá duldosa o que nin siquiera obedecen al interés xeneral". Otramiente, Areces dio anuncia de qu'Ana Rosa Migoya va encabezar la delegación oficial que va dir al Gran premiu de Fórmula 1 de China a festeyar el campeonatu mundial de Fórmula 1 de Fernando Alonso.