Areces diz que la emigración de titulaos universitarios ye una "lleenda urbana"

El presidente asturianu afirmó na presentación d'un estudiu sobre empleabilidá de los universitarios asturianos que la idea xeneralizada qu'esiste de que la mocedá asturiano más preparao tien qu'emigrar p'alcontrar trabayu ye una "lleenda urbana"

Joaquín Lorences ye Caderalgu de Fundamentos del Análisis Económicu na Universidá d'Uviéu y ún de los meyores conocedores del mercáu llaboral asturianu. El profesor presentó ayeri un estudiu fechu pola Universidá y que va encargase d'espublizar la Conseyería d'Economía sobre la colocación llaboral de los sos llicenciaos que-y sirvió al presidente asturianu pa defender les sos tesis que faen de menos la importancia de la emigración xuvenil asturiana. Areces afirmó que la idea d'una emigración xuvenil masiva de titulaos universitarios ye una "lleenda urbana" y destacó tamién que-y paecía positivo que marchen universitarios a trabayar fuera porque la movilidá ye una cosa a la que s'afala dende les instituciones comunitaries europees, siendo la enseñanza más importante del estudiu pal presidente que l'esfuerzu nel estudiu "tien premiu"

Según los datos que remana l'estudiu, el 71,8 por ciento de los titulaos que salen de la Universidá d'Uviéu viven n'Asturies contra'l 28,2 por cientu qu'emigraron pa buscar trabayu. D'estos, el 24% ficiéronlo n'otres comunidaes autónomes del Estáu Español, mientres qu'un 4,2% foron pa otros estaos. Les conclusiones del estudiu lleven tamién a Lorences a afirmar que los universitarios asturianos que colen del país pa trabayar fuera "nun son los meyores" afirmación que vien de facer una comparanza ente los vezos migratorios de los que saquen más nota y los que tuvieron peor espediente académicu. Asina, un 69% de los espedientes con notes altes y un 74% de los espedientes de nota baxa quedaron n'Asturies, una diferencia de cinco puntos que nun permite al paecer de Lorences falar de que tean marchando los más preparaos.

Ente otros aspectos, l'informe sorraya tamién que'l 65 por cientu de los titulaos que trabayen entraron al mercáu llaboral a los dos años d'acabar la carrera y que nun hai una gran diferencia de xéneros a la hora d'alcontrar colocación ente los titulaos universitarios. Por titulaciones, Xeografía y Historia y les humanidaes en xeneral son les que tien peor índiz de colocación y medicina, informática y mines les que permiten alcontrar trabayu más rápido.