Areces comprométese a siguir el Plan de Normalización

El presidente asturianu en funciones y aspirante a la presidencia, Vicente Álvarez Areces, comprometióse ayeri nel debate d'investidura a siguir el desarrollu del Plan de Normalización del Asturianu. Areces aseguró que va cumplise'l Plan de Normalización de l'anterior llexislatura, lo mesmo que van caltenese les midíes entamaes n'anterior llexislatura pa la promoción social de la llingua asturiana y del gallego-asturianu nel occidente asturianu, too ello dientro d'un "principiu elemental de respetu y valoración de la diferencia". Nel repasu de les cuestiones a tratar nel debate sobre la reforma del estatutu, el presidente incluyó tamién la cuestión del reconocimientu de la llingua del país nel testu estatutariu como ún de los debates a tener.

La non presencia d'IX-BA-LV nel executivu, fuerza comprometida cola oficialidá del asturianu y que siempre defendió polítiques de normalización más intenses que les que s'ufiertaben dende les demás fuerces del arcu parlamentariu asturianu, semare bien de duldes sobre cual diba ser el futuru de la política llingüística. La referencia al asturianu nel discursu d'investidura por parte d'Areces ye la primer anuncia qu'aporta daqué de lluz sobre'l particular.