Areces asegura que la reforma del Estatutu va abordar la "consideración del asturianu"

El Presidente del Principáu, Vicente Álvarez Areces, apostó ayeri porque Asturies contribuya a "caltener un Estáu fuerte y un poder central" frente a proclames nacionalistes que "planteguen romper esi espaciu públicu en nome de pretendíos derechos históricos", pa xustificar "la emerxencia d'un nuevu suxetu políticu". Areces fizo estes reflexones nel so discursu d'apertura del Debate d'Orientación Política qu'entamó ayeri na Xunta Xeneral del Principáu.

Na so intervención, el presidente avanzó delles llinies que considera que tienen de centrar el debate de la reforma estatutaria que va entamar d'equí a poco. El xefe del Executivu defendió la necesidá d'entamar la so tramitación y recordó qu'Asturies ye "una comunidá consciente de la so fuerte personalidá y de la so identidá propia", pero "integrada dafechu nel senu de la nación española". "Queremos dende Asturies contribuyir a facer más anchu y non más estrechu l'espaciu públicu español, un espaciu públicu de ciudadanos, suxetos de derechos y obligaciones polítiques con un sentíu de pertenencia alloñáu de cualquier esencialismu", añadió'l presidente, que reivindicó la importancia de que la reforma se faiga "dende'l consensu políticu y dende'l plenu respetu al marcu constitucional".

Sicasí, nel marcu de "l'ampliación del autogobiernu" d'Asturies, Areces plantegó dellos exes a tener en consideración.

Ente les premises a tener en cuenta menionó la consideración estatutaria de la llingua asturiana, l'afondamientu de los derechos y deberes de la ciudadanía.

Tocante al estáu de l'autonomía asturiana, Álvarez Areces, destacó qu'Asturies ta en crecimientu y nun se pue parar. "L'acción política nun tien d'echar el frenu al crecimientu del Principáu", dixo'l xefe del Executivu, que manifestó que'l periodu políticu qu'entama na Cámara tien pal so Gobiernu trés grandes oxetivos pa "acompañar a la sociedá asturiana nel so dinamismu", que son, xunto cola reforma de l'Estatutu, la concertación social y los Presupuestos del Principáu, de los que peligra la so aprobación en vista del equilibriu de fuerces na cámara.

Emponderando los presupuestos ellaboraos pol so equipu y amestándolos a les cifres de los xenerales d'España, Areces, anunció que la inversión n'Asturies nel 2008 va xubir a 2.000 millones d'euros. Areces también comprometió nueves reformes fiscales que favorezan a los "autónomos y empreses individuales al traviés del Impuestu de Donaciones". "Vamos estender esti nuevu apoyu en Donaciones y el que ya existe en Sucesiones p'autónomos a les pequeñes y medianes empreses, con independencia de la manera xurídica qu'adopten", dixo. Según afirmó, l'herederu d'una pequeña y mediana empresa va disfrutar nel Principáu d'un amenorgamientu del 99 por cientu. Amás, la donación de pequeñes y medianes empreses va quedar "prácticamente lliberada d'impuestos", según Areces.