Areces anuncia un gobiernu con diez conseyeríes tres ser escoyíu presidente

El candidatu socialista a la presidencia d'Asturies, Vicente Álvarez Areces, ta acabante de ser escoyíu presidente del gobiernu asturianu na segunda sesión d'investidura na Xunta Xeneral. Areces algamó la mayoría simple de los votos nel parlamentu asturianu con ventiún votos a favor, que correspuenden a los del grupu socialista, mientres que'l PP y IX-BA-Los Verdes abstuviéronse. D'esti mou Álvarez Areces repite por tercer vez como presidente d'Asturies. Asimesmo aprovechó la so investidura pa dar anuncia de la composición del nuevu gobiernu, que va contar con diez conseyeríes y con cuatro conseyeros nuevos: Encarnación Rodríguez, anguaño xerente de la Orquesta Sinfónica del Principáu d'Asturies, va tar en Cultura y Turismu, Pilar Rodríguez en Bienestar Social, José Ramón Quirós en Salú y Servicios Sanitarios, mientres que Mediu Ambiente y Desarrollu Rural va corresponder a Belén Fernández. Pela so parte Ana Rosa Migoya pasa a Alministraciones Públiques y Portavocía del Gobiernu, mientres que repiten na Conseyería de la Presidencia y Igualdá, María Jose Ramos, Jaime Rabanal n'Economía y Asuntos Europeos, José Luis Iglesias Riopedre n'Educación y Ciencia, Francisco González Buendía en Política Territorial y Infraestructures, y Graciano Torre n'Industria y Empleu.