Una web de consulta del archivu históricu de la Universidá d'Uviéu escaez l'asturianu

Esta selmana la Universidá d'Uviéu anunciaba la estrena d'una web pa consulta del archivu históricu de la institución. Esta ferramienta permite usar el castellanu, el gallegu, l'eusquera y el catalán, pero non l'asturianu, lo que provocó les crítiques del Conceyu Universitariu pol Asturianu (CUPA). "Ye bien llamativo que la Universidá d’Uviéu ufra esti serviciu en toles llingües del Estáu español menos na llingua propia d’Asturies, protexida polos propios estatutos de la universidá asturiana", señala'l coleutivu, que solicitó al rector, Vicente Gotor, por carta que cumpla cola normativa y que s'incluya la llingua asturiana.

La escusa puesta pola Universidá d'Uviéu ye que'l servidor informáticu nun depende de la institución y qu'ellos nun pueden facer la torna, argumentu que dende'l CUPA consideren "llamentable".