Aragón pon los pegoyos pa tener una academia de la llingua

Dende'l xueves 13 de xunetu y hasta'l viniente sábadu 15 de xunetu celébrase n'Aragón, el II Congresu del Aragonés, que tien l'oxetivu de crear l'Academia de la Llingua Aragonesa. L'alcuentru cuenta con notable representación institucional de les academies Vasca, Gallega, del Institutu d'Estudios Catalanes y del Institutu d'Estudios Occitanos, xunto cola representación asturiana compuesta pol Vicepresidente de l'Academia de la Llingua Asturiana, Miguel Ramos Corrada y el Xefe de la Oficina de Política Llingüística Ramón d'Andrés Díaz.


Nes Xornaes Ramón d'Andrés presentó n'aragonés y asturianu a Miguel Ramos Corrada, de l'Academia de la Llingua, qu'ufiertó una ponencia sobre'l papel normativizador de l'ALLA. Nesti actu taba confirmada la máxima representación institucional del Gobiernu d'Aragón col so presidente Marcelino Iglesias (PSOE). Al nun poder asistir, el Viceconseyeru d'Educación lleó les palabres del presidente onde s'anunció que diba retomase non muncho más p'alantre la Llei de Llingües d'Aragón que -yos va dar reconocencia a les otres llingües, amás del castellanu, de la comunidá: L'Aragonés y el Catalán.