Apaez una obra inédita de Pepín de Pría

Los heriedes del escritor llaniscu Pepín de Pría alcontraron una obra inédita del autor de "Nel y Flor" y "La Fonte del Cai" que se tenía por perdida. El manuscritu va entregase al Real Institutu d'Estudios Asturianos (RIDEA). La obra entitúlase "La media cama" y teníase conocimientu de la so esistencia. La familia del escritor va ufiertá-y al RIDEA la publicación de la mesma en cuantes que la institución yá asoleyare les demás obres de Pin de Pría.

L'apaición del manuscritu, redactáu n'asturianu, nel marcu del congresu d'Estudios Asturianos, coincide cola polémica en que se vio metíu'l RIDEA por nun almitir una ponencia redactada en llingua asturiana. Mientres les autoridaes organizadores del congresu anecien na so postura. La filóloga Josefina Martínez, responsable del tribunal que refugó la ponencia de la polémica y conocida enemiga de la normalización del asturianu, declaró nesti sentíu al diariu de Xixón "El Comercio" que la conferencia de Yolanda Magdalena refugóse"non por tar n'asturianu" sinón por tar redactada "nun auténticu galimatíes".

Alrodiu d'esta polémica, el Conseyeru de Xusticia Javier Valledor aseguró ayeri n'acabando la reunión del Conseyu de Gobiernu, que'l máximu órganu de gobiernu asturianu llegare ayeri al alcuerdu de que n'ediciones socesives, los congresos del RIDEA diben tener qu'almitir ponencies redactaes n'asturianu por encamientu del mesmu gobiernu. Nesti sentíu, Moisés Llordén, otru de los responsables de la organización del congresu, declaró tamién que pa próximes ediciones sí diben aceptase ponencies "nuna de les llingües o subdialectos que se falen n'Asturies".