Apaez un palaciu del sieglu XV en Castrillón

Les escavaciones que tan faciéndose pa la parte de raíces, en conceyu Castrillón, tan apurriendo bien de datos y afayos dignos de mención. L'apaición nes escavaciones que tan faciéndose en conventu de la Mercé de la fachada d'un palaciu del sieglu XV supón ensin dulda'l llogru más importante d'estos llabores de rescate del nuestru pasáu. Iván Muñiz y Alejandro García son los arqueólogos responsables de l'apaición d'esta fachada que presenta un arcu apuntáu y que tien l'escudu d'armes de los González d'Uviéu, nobles avilesinos propietarios del edificiu, pal que los espertos proponen una datación abierta dientro del sieglu XV, con un marxe de feches ente'l 1413 y 1483. Los palacios de Valdecarzana n'Avilés, el Palaciu de los Rivero en Llanes o la casona de La Rúa n'Uviéu son los parientes más allegaos a esta construcción d'últimos de la edá media. Les escavaciones en Raíces yá apurrieren l'apaición d'enterramientos medievales.

El monesteriu de la Mercé creárase a últimos del XV gracies a la cesión del palaciu por parte de la familia González d'Uviéu a la orde mercedaria, abandonando la comunidá relixosa l'edificiu a últimos del sieglu XVIII y pasando les construcciones relixoses a repartise ente caseríes, cuadres y tenaes.