Apaez un grabáu desconocíu na Cueva d'el Pindal

La Conseyería de Cultura del Principáu d'Asturies presentó esta mañana l'afayu d'un interesante grabáu prehistóricu que representa un bisonte y que s'atopó na cueva del Pindal, en Pimiango conceyu Ribedeva. Pintáu nun relieve de la paré que sonsaña la forma del animal, la pintura estrémase nesti puntu de toles demás representaciones de la cueva, que nun aprovechen de la mesma manera estos efectos de relieve.

La guía de la cueva María Pumariega foi la responsable del afayu d'esta pintura, que se resistió a presentáse énte los güeyos de los investigadores anque va yá casi cien años que se tien conocimientu de les pintures d'esta cueva, descubierta nel añu 1908 por Emilio Alcalde del Río, que dempués dexó constancia de les maraviyes de la cueva na obra "Les cavernes de la Region Cantabrique" un llibru que firmó xunto col abate Henri Breuil y Lorenzo Sierra. Nel añu 1954 F. Jordá y Magín Berenguer estudiaron la cueva y atoparon delles figures desconocíes, hasta completar un catálogu que tien 9 caballos, once bisontes, ciervos, ún xabalín y incluso un pexe y un mamut, pero'l bisonte siguió esmucíu hasta agora.

Monumentu nacional dende enantes de la Guerra Civil, la cueva del Pindal, presenta horizontes de poblamientu ente'l periodu Asturiense y el Magdeleniense final, va aproximadamente ente 18.000 y 13.000 años.