Antón García lleva’l XXXV Premiu Xosefa Xovellanos y Carbajal, el XX Xuan María Acebal

|

Yá se conocen los cinco autores gallardonaos colos Premios Lliterarios 2014 de la Conseyería d'Educación, Cultura y Deporte tres el doble fallu d’esti llunes. El XXXV Premiu Xosefa Xovellanos de novela foi pa Antón García, mentes que’l XX Premiu Xuan María Acebal de poesía llevólu Ángeles Carbajal.

El xuráu del Xosefa Xovellanos, presidíu por Ana María Fueyo, direutora xeneral de Política Llingüística, aconceyó ayeri cola presencia de los escritores Pablo Rodríguez Medina –ganador de la edición anterior–, Ana Vanessa Gutiérrez, Roberto González-Quevedo y Paz Fonticiella, amás del téunicu en materia lingüística Xosé Miguel Suárez Fernández ‘Tapia’. Estos espertos decidieron conceder por mayoría’l gallardón a la novela ‘Crónica de la lluz y la solombra’, firmada por García baxo l’alcuñu de ‘Escudiella’, por “l'habilidá pa narrar el sucesu central de la hestoria dende múltiples puntos de vista y la maestría nel manexu de rexistros llingüísticos colos que s’algama un ritmu bien llográu”. D’esta forma, l’escritor de Tuña y fundador de Tsibros de Frou y Trabe suma’l so tercer Xosefa Xovellanos tres ganar les ediciones sétima (1986), con ‘El viaxe’, y decimoctava (1997), con ‘Díes de muncho’, nesta ocasión ex aequo con ‘La ciudá encarnada’ de Pablo Antón Marín Estrada.

Fueyo tamién presidió’l xuráu del Xuan María Acebal, que tuvo conformáu polos escritores Pablo Texón y Sofía F. Castañón, y el filólogu Luis Casteleiro. Ésti decidió por unanimidá entregar el premiu a la obra ‘L’aire ente la rama’, de Carbajal, presentáu baxo’l nomatu de ‘Entel’, por “la voz personal y madura con que se va construyendo un poemariu harmónicu y de gran intensidá rítmica”. Nacida n’Argüelles, esta escritora ye autora de poemarios en castellanu y asturianu, como ‘En campu abiertu’, col que ganó nel 2012 el Premiu Teodoro Cuesta.

Restu de premiaos

El restu de gallardonaos nos Premios Lliterarios 2014 qu’entrega la Conseyería d’Educación, Cultural y Deporte son Carlos González Espina, con ‘Cápsules de tiempo’ (VII Premiu María Xosefa Canellada de lliteratura infantil y xuvenil); Damián Barreiro, con ‘Caleya Sésamu: el papel de la televisión na tresmisión interxeneracional de la llingua’ (XX Premiu Máximo Fuertes Acevedo d’ensayu); y Enrique Carballeira, con ‘L’arume de la tierra’ (VI Premiu Alfonso Iglesias de cómic). Toos ellos lleven una recompensa de 3.000 euros.

Contador Estadistiques