Andecha Astur va manifestase l'ochu de setiembre en Xixón

La organización nacionalista Andecha Astur convoca una
manifestación en Xixón pal prósimu 8 setiembre. Baxo'l
lema "Democracia p'Asturies. Escontra la represión española,
soberanía popular asturiana", que sigún los responsables
desta organización quier amosar "per un llau, la refuga d'Andecha
Astur a los numberosos casos de represión asocedíos nel
añu caberu y sofríos por persones venceyaes al movimientu
d'izquierda asturianu, ente los que rescampla l'encarcelamientu de los
sindicalistes Cándido González Carnero y Juan Manuel
Martínez Morala, y, per otru, l'alcordanza de la declaración de
soberanía fecha pol Conseyu d'Asturies y Lleón en 1937, va
esautamente 70 años".

La manifestación, na que van participar delegaciones de la
organización xuvenil Darréu, el sindicatu Corriente Sindical
d'Izquierda (CSI) y l'Asociación d'Inmigrantes Residentes n'Asturies
(AIRA), va salir a les 13'00 hores de la Plaza l'Humedal y finar na Plaza'l
Parchís, énte la Casa Blanca, edificiu que fuere sede del Conseyu
Soberanu d'Asturies y Lleón, onde "van tener llugar les
intervenciones públiques de los voceros de la organización y de
los coleutivos convidaos".