Andecha Astur nun se pronuncia sobre la ufierta de Mesa de Unidad de los Verdes

El partíu políticu nacionalista Andecha Astur emitió esta mañana un comunicáu de prensa nel que la Xunta Executiva de la formación afirma qu'inda nun va pronunciase sobre la coalición electoral cola agrupación Mesa de Unidad de Los Verdes a la espera de que la Xunta Nacional d'Andecha llegue a un alcuerdu sobre esta ufierta. Al empar, Andecha asegura que nun s'entamó nesti sen un procesu de negociación en firme col grupu verde d'Esteban Cabal, formación que como informó Asturies.com esta selmana, nun tien rellación con Los Verdes d'Asturies.

D'otra manera, Andecha Astur fala nel mesmu comunicáu de la esistencia d'un "procesu d'averamientu" a Izquierda Asturiana (IAS) p'algamar un "alcuerdu electoral de la izquierda nacionalista asturiana nel 2007". La formación nacionalista tamién asegura que'l so enfotu ye'l de "negociar alcuerdos con persones y sectores sindicales, vecinales y ecoloxistes de cara a les elleiciones de 2007" y adelanta que la so Xunta Executiva "vien de dar los primeros pasos nesti sentíu".