Andecha Astur negocia una llista col partíu Mesa de unidad de Los Verdes

El portavoz del partíu políticu "Mesa de Unidad de Los Verdes" Esteban Cabal aconceyó güei en Villaviciosa con David Rivas, candidatu a la presidencia d'Asturies por Andecha Astur. Na reunión, el representante de la Mesa ofreció-y a David Rivas la posibilidá d'apautar una coalición pa concurrir conxuntamente a les elecciones autonómiques y municipales del 2007 baxo'l nome "Andecha Astur - Los Verdes".


Según la información apurrida por esta formación ecoloxista, al alcuentru asistió tamién Marcos Abel Fernández, miembru de la Executiva d'Andecha Astur. La defensa del mediu ambiente asturianu y especialmente de la costa asturiana de les amenaces urbanístiques, ufiertando "un modelu de desarrollu nuevu" sedríen l'exe de la campaña d'esta coalición que tendría por candidatu a David Rivas, que, pela so parte, congracióse del ofrecimientu de Mesa de Unidad de Los Verdes y anunció que diba aconceyar mañana miércoles 19 de xunetu cola Executiva d'Andecha Astur pa facé-y llegar al partíu l'ofrecimientu.


Puestos en contactu col representante del partíu políticu "Los Verdes d'Asturies", Joaquín Arce, esti aclarió a Asturies.com que la "Mesa de Unidad de Los Verdes" ye un partíu que nun ta inxertu na Confederación de Los Verdes del Estáu español a la que sí pertenez "Los Verdes d'Asturies" nin nos Verdes Europeos y matizó que a la Mesa nun se-y conoz representatividá nin militancia n'Asturies.
El representante de "Los Verdes d'Asturies" amosó'l so malcontentu col funcionamientu d'esta otra formación, que, anque nun acepta inxertase na Confederación de Los Verdes, copia dende va años en tolo posible los sos emblemes y llogotipos de la formación oficial que tien ún diputáu en Congresu y otru nel Parllamentu Européu. Nes últimes elecciones al Congresu d'España, la llista de "Los Verdes d'Asturies" consiguiere 4.633 votos.