Andecha Astur esixe una conceyalía de participación ciudadana en Villaviciosa

L'agrupación de Villaviciosa de la organización política Andecha Astur emitió ayeri un comunicáu en que denuncia l'incumplimientu por parte del Partíu Popular, que manda en Villaviciosa con mayoría absoluta, de la so promesa electoral de creación d'una Conceyalía o Estaya de Participación Ciudadana, que prometiere nel añu 2003.


Dende AA de Villaviciosa asegúrase que nos cuatro años de llexislatura "la única actuación del Ayuntamientu Villaviciosa nesta estaya" foi "la ellaboración y unvíu d'un borrador de reglamentu de participación ciudadana" que s'asegura que llegó a la Federación d'Asociaciones de Vecinos de Villaviciosa n'avientu de 2004, al poco de criticar por primer vegada la situación la mesma Andecha Astur. El conceyu nun volvió a tener iniciativa nenguna nin dio rempuesta a la federación d'asociaciones, que sí s'interesó por sacar alantre'l documentu.