Andecha Astur escoyó a David Rivas como candidatu pal 2007

La organización política nacionalista Andecha Astur celebró esti sábadu día 27 en Candás (Carreño) la continuación del so Conceyu Nacional, na que tenía de decidise la Xunta Executiva del partíu y la persona que diba defender esta opción política como candidatu a la presidencia d'Asturies nel 2007.

No tocante a la cuestión electoral, l'economista David Rivas, que yá defendiere les sigles d'AA nes elecciones de 1999 y 2003, va ser tamién el candidatu nes del 2007 dempués de que'l Conceyu Nacional d'Andecha Astur lu escoyere esti sábadu por unanimidá, mientres que no tocante a la dirección del partíu, esta va iguala un equipu de 16 persones que contaron col 90% de los votos del Conceyu Nacional y nel que tamién va tar el mesmu Rivas nel cargu d'Economía y rellaciones esteriores.

Nesta Xunta Executiva Germán Abad va ser el secretariu d'organización con Roberto Holgado faciendo llabores de coordinador. Olaya García va ser la responsable de política nos conceyos, Mª Jesús Varela va encargase de la estaya de llingua y educación, César González de la de mediu ambiente y Octavio Trapiella va tar al frente de la estaya sindical, mientres que Xicu Mata va ser el responsable de cultura. D'otra manera, Guillermu Fernández va ser el responsable de medios de comunicación, con Antón Martínez de responsable de medios dixitales y Xaime Florentino de propaganda. Como representantes de conceyos onde AA tien representación política van tar Alberto Fidalgo por Carreño y Violeta Santapaz por Riosa, mientres que la estaya de formación del partíu va tar al cargu de Carlos Moreno y Carolina Díaz va encargase de l'ayalguería de la organización. Darréu, la organización de mocedá d'Andecha Astur, va tener ún representante nesta Xunta Executiva na persona de Mariu Arbesú.

La organización política definió esta nueva Xunta Executiva como una "rempuesta al crecimientu de la organización" y sorrayó que la mocedá tien un importante papel nella suponiendo "un remocicamientu de la media d'edá en rellación cola anterior executiva". El partíu nacionalista afitóse na so "defensa de la identidá d'Asturies como pueblu y de la solidaridá y la xusticia social" comprometiéndose a siguir aumentando'l nuestru trabayu colos movimientos sociales".