Andecha Astur de Siero califica de "surrealista” la propuesta de la Xunta Toponimia pal Conceyu.

La organización política define a la Xunta de Toponimia como "una ferramienta de llaváu de cara d'IU" y asegura que'l trabayu que fai correspuénde-y llevalu alantre a l'Academia de la Llingua Asturiana.

Nel so durísimu comunicáu, AA de Siero afirma que "la Xunta de Toponimia namás respuende a los intereses del gobiernu PSOE-IU, que nun tien una política llingüística seria y que niega derechos fundamentales como ye'l de la oficialidá de la llingua propia". AA de Siero échase al pie de la propuesta toponímica ellaborada pola Academia de la Llingua nel so llibru "Nomes de Conceyos, Parroquies, Pueblos y Llugares del Principáu d'Asturies" calificando de "surrealista" la propuesta de la Xunta de Toponimia en cuantes que delles de les sos propuestes "estrémense dafechu de la resolución académica" citando ente otros los casos de les formes Carbayín / Carbaín, Bobes / Valbona, Samartín d'Anes / Samartindianes. AA de Siero considera tamién "mui grave" que se propongan denominaciones billingües casu de Lugones-Llugones cuando-y abulta "de sentíu común" que se tien qu'oficializar únicamente la denominación tradicional asturiana.

Pa l'agrupación política "el proceder de la Xunta de Toponimia, coles sos propuestes a la escontra de les resoluciones académiques de la institución a la que-y correspuenden les competencies normativizadores, namás trai confusión ente la población, dificulta la normalización social de la Llingua Asturiana y desprestixa'l gran llabor de l'Academia , y incluso la propia llingua, énte la ciudadanía".